Teherani tres capite damnati sunt

Nuntius ministri iustitiae Persarum dixit tres homines accusatos capitis damnatos esse propter ea quae ferventibus perturbationibus egissent. Rei, quorum nomina pervulgata non sunt, superiore tribunali iterum iudicandi sunt. Duo captivi accusantur quod factioni monarchicae faveant, tertius quod in Exercitu Iraniae liberationis, id est "Mujahedin", militet. Ante paucos dies reclamans quidam monarchicus capitis damnatus erat.

Mense Iunio multitudines fora viasque Teherani ceterarumque urbium Persicarum invaserunt, postquam suffragia praesidenti Mahometo Ahmadinejad iterum victoriam tribuerant, regimen ambitus accusantes. Sed Custodes commutationis, id est militiae regiminis islamici, vi turbas represserunt et nonnullos rebelles percusserunt et in vincula coniecerunt. Tunc imagines telephoniis mobilibus impressae in toto orbe per interrete diffusae sunt, indignationem usquequaque excitantes, nunc tamen captivi sine clamore ullo ante iudices deferuntur, ubi saepe minis sceleribus confitendis compelluntur aut gravibus poenis condemnantur.

Scripsit Herimannus Novocomensis