13 FOSSORES NECATI DISPLOSIONE METHANI

Calamitas fossoria in Silesia

Biduum lugebunt Poloni propter mortem tredecim fossorum, qui in Silesia gasi venefici diruptione interierunt. Operarii in minis "Wujek" urbis Ruda Slaska (Vena Silesiana) carbonem effodiebant, cum methanum ex ima terra diffusum flammis succensum complures miseros combussit: tredecim confestim mortui sunt, triginta gravibus ustionibus affecti in proximo nosocomio iacent, quorum aliquot nomina indici victimarum forsitan mox addenda erunt. In minis carboniferis saepe fossores moriuntur, sed nulla tantae immanitatis calamitas commemoratur ab anno bismillesimo sexto, cum in minis "Halemba" eiusdem urbis Silesianae tres et viginti simili pernicie vitam amiserunt.

Minae "Wujek" notae sunt quoque morte anno 1981 novem fossorum, occisorum a biocolythis cum repugnare conati sint modo indictae a regimine communistico condicioni summae necessitatis (sive statui belli), qua motum operariorum "Solidarnosc" communistae coercere sperabant.

Scripsit Herimannus Novocomensis