De comitiis Afganis

Neglectis minis Talibanorum, qui se digitos atramento maculatos resecturos esse promiserant, multi incolae Afganistaniae Jovis die se suffragiis interfuturi contulerunt: tam praesidens Hamid Karzai quam rectores civitatum occidentalium, quarum militiae iam diu in urbibus invigilare pergunt, quiete et recte suffragia habita esse confirmant. Nihilo minus longe a Cabura, nationis capite, ter et septuagies impetus in suffragia ferentes et sedes comitiorum factum est.

Secundus quisque civis suffragia tulisse refertur. Ambo candidati, id est Hamid Karzai et Abdullah Abdullah, quibus victoria ab observatoribus fautura esse putabatur, se maiorem partem consensuum obtinuisse confirmant.

Scripsit Herimannus Novocomensis