RES PIRATICA IN MARIBUS EUROPAE VIGET?

Navis Russica reperta in oris Africae

Navis Russica, cui nomen "Maris Arctoi", reperta esse nuntiatur in oris Africae occidentalis, 400 miliaribus nauticis ab insulis Promunturii Viridis (Cape Verde). Quae navis cum 15 nautis Russis capta a piratis esse creditur ante duas septimanas in undis Sinus Biscaici. Causam captionis piraticae esse disputationem inter mandras sceleratorum.

"Mare Arctoum", quae potest onera ferre usque 4.000 tonnarum, est navis Russica, licet naviget officialiter sub vexillo Malitensi. Ultimo itinere vehebat ligna e quodam portu Finnico in portum Algeriensem Bejaia. Nunc autem conspecta esse nuntiatur a nautis variarum navium in parte maris, cui est aditus liber internationalis, id est non in zona litorali Insularum Promunturii Viridis, quae sunt sui iuris terra. Quod factum prohibet biocolytas Capeverdianos, quominus navem quaesitam ascendant. Nuntios nautarum confirmare reportantur speculatores Gallici.

Nullus adhuc nuntius allatus est de sorte 15 nautarum "Maris Arctoi". Nonnulli rerum maritimarum periti putant tamen captionem huius navis non esse "verum" actum piraticum, at agatur hic potius de contentione inter duas mandras sceleratorum, videlicet e Russia oriundorum. Nonnullae agenturae diurnariae nuntiaverunt "Mare Arctoum" suspectam ab una harum mandrarum fuisse substantias narcoticas inter ligna portare, quibus ipsi se potituri sperarent. Navem bis a "piratis" petitam esse, primum prope oram Sueticam Maris Baltici, deinde in Sinu Biscaico, prope oram Lusitaniae (Portugaliae).

"Mare Arctoum" quaerebatur praeteritis diebus a quinque navibus longis Russicis in Oceano Atlantico.

Scripsit ANL