TALEBANI ADORIUNTUR SIMUL DUAS URBES AFGHANAS

Bellum Afghaniense gravescit

Die Martis contigit rebellatoribus gregis Taleban adoriri simul loca in duobus satis magnis urbibus orientalis partis Afghanistaniae, prope ad provinciam Helmand, ubi a duobus septimanis milites foederis NATO incurrunt in zonas adhuc ab islamistis occupatas.

Agmina militum Talebanorum atque suicidae ictus bombiferos patrantes aggressi sunt loca in urbibus Gardez (hic etiam aedes burgimagistri petitae sunt) necnon Jalalabad in limite Pacchistanico. Licet his ictibus tantum quinque sexve milites operariive regiminis Afghanici mortui sint, omnes analytici rerum politicarum Mediae Orientis assentiuntur bellum Foederis Atlantici, ab agminibus regiminis Afghanistaniae parum adiuti, contra islamistas gravescere. Ab initio enim huius mensis iam supra 55 milites terrarum occidentalium a Talebanis aut in pugnis aut insidiis (usu globorum incendiariorum) aut ictibus bombiferis suicidiariis occisi sunt. Maximum numerum necatorum (saltem 27) constituunt milites US-Americani, deinde Britanni (saltem 17) et Canadiani (saltem 5).

Res in tale discrimen adductas esse, ut secretarius generalis NATO, Jaap de Hoop Scheffer, publice monitus est reditum foederis ex Afghanistania nunc, motu Taleban minime superato, significare vastationem totius Afghanistaniae atque porro inflammationem belli civilis in vicina Pacchistania necnon aliis regionibus Asiae Centralis.

Die 20 Augusti in Afghanistania habitum iri electiones novi praesidentis.

Scripsit ANL