Annus
2 0 0 9


RECLAMATIONES PERSARUM PORRO PERDUCENDAE

RECLAMATIONES PERSARUM PORRO PERDUCENDAE

Mousavi diem maeroris annuntiat

Reclamationes porro perduci in viis Tehereaniae, urbis capitis Persarum, exspectantur, cum ductor oppositae liberalis partis Hosein Mousavi ad suos appelavit, ut diem maeroris observarent, commemorantes octo homines die Lunae in pugnis contra biocolytas islamicas fautoresque praesidentis Ahmadinejad necatos. Mousavi dixit se velle novas reclamationes pacifice perductum iri. Regimen tamen, quod antea omnes demonstrationes publice haberi prohibuerat, nullum responsum dedit ad consilia novissima oppositae partis luctum celebrare.

Reclamationes in Irania exortae sunt, cum officialiter pronuntiatum esset victorem comitiorum praesidentis Persarum discessisse adhuc hoc munere fungentem Mahmoud Ahmadinejad, cui duae trium partes suffragatorum fidem dedissent. Aemulus tamen huius, Mousavi, dixit electiones fraudulenter peractas esse. In viis Teheraniae fautores amborum inter se abhinc pugnant, reclamantibus factionis Mousavi asseverantibus biococolytas militiae islamicae (Basij) actuosos praesidentis Ahmadinejad multoties in pugnis adiuvare.

Multos fautores Mousavianos aut domi aut in loco operis aut in aedibus studentium a biocolytis apprehensos atque in carceres ductos esse. Inter apprehensos sint editor et scriptor principalis ephemeridis oppositae partis. Diurnariis autem peregrinis prohibitum est in vias Teheraniae porro proficisci. Summus dux religiosus Persarum, Ali Khamenei, appelavit ad cives ut "uniti manent in sua civitate islamica". Qui tamen antea dixit se velle computationem suffragiorum iteratum iri, ut pax in terra restituatur.

Scripsit ANL



Retro ad:

Novissima editio
Summum paginae