ELECTIONES EUROPARLAMENTI: BATAVICAM PVV PROGRESSUM FECISSE

Reditus partis dextrae?

Contra legem silentii comitialis die Veneris vespero media Batavica nuntiaverunt alteram huius terrae maximam partem in parlamento Europaeo fore Factionem Libertatis (PVV) duce Geert Wilders. Quae factio eurosceptica magna voce reclamat immigrationi in Holandiam advenarum e terris musulmanicis oriundarum at hos, qui in Batavia iam vitam degunt, cogere vult ad "mores sociales Batavicos" adhibendos. Ipse Wilders in ius phyletismi accusatus vocatur propter dicta, quae musulmanis Batavicis nimis sibi libroque sui sacro, Al-Corano, odiosa videntur.

Batavia (sive Holandia) una cum Britannis primo die electionum parlamenti Europaei (cui 736 sellae omnino adsunt) comitia sua habuit, die scilicet Iovis. Maxima autem pars 27 terrarum sociarum Unionis Europaeae (UE) die Saturni aut Solis die comitia tenent, effectus ergo suffragandi divulgare per totam Europam officialiter non licet usque horam Greenwhichanam 20:00 diei Solis. Nihilominus, legem silentii violantia media Batavica inopinatum progressum PVV annuntiaverutn. Quae factio quinta demum vis est in parlamento Batavico, sed nunc videtur tantum a democratas christianas (Batavos) superari et quinque e numero 25 sellarum Batavis in Europarlamento servatarum possessura.

Contra emigrantes dicendo voces suffragantium colligere volunt multi politici dextrae partis in Europa Occidentali. Ante paucos dies minister primarius Italiae, Silvio Berlucsconi, cum Mediolanum visitaret, dixit hanc urbem sui natalem hodie potius urbi cuidam Africanae quam Italae esse similem.

Simul cum electionibus europarlamentariis Britanni in multis regionibus comitia localia habuerunt, quibus maximos progressus fecisse videntur conservatistae eurosceptici (Tories) duce David Cameron. Qui vir politicus pollicetur se contra tractatum Lisbonensem UE ardenter studere, si factio eius potestatem Britanniae capiet.

Scripsit ANL