COREA BOREALIS MINATUR SE VI RESPONSURAM

Nolite naves nostras tangere!

Si milites classis Coreae Meridionalis naves Boreocoreanas perscrutari conati erunt, exercitus Coreae Borealis vi ad talia conamina respondebit - minatus sunt magistratus communistici, qui in potestate tenent septentrionalem partem Paeninsulae Silentii Matutini seu Coreanae, quique praeteritis duobus diebus inopinate displosionem subterrestrialem pyroboli atomici volatumque missilium novissimorum (ad cuspides nucleares ferendas idoneorum) perfecerunt. Haec facta mundus occidentalis atque etiam amici veteres Boreocoreanorum - Sinae Russique - ut acta valde paci internationali in regione Asiae Orientalis innocentia esse nuncupaverunt.

Studiis nuclearibus communistarum Coreanorum valde indignatum regimen USA proposuit a Nationibus Unitis licentiam posci, ut naves portos Boreocoreanos petentes perscrutari agminibus internationlibus liceret, ita prohibendo quominus ulla materia nuclearis aut res ad eam fabricandam idoneae hanc terram attingerent. Regimen Coreae Meridionalis, quae est terra socia US-Americanorum, se pronuntiavit paratum esse talia consilia probare. Qua pronuntiatione ad iram adducti magistratus communistici dixerunt Coream Borealem non porro principiis armistitii anni 1953 (quo bellum Coreanicum finitum erat) parituram esse.

Si milites australis partis paeninsulae naves septentrionalium Coreanorum ascenderint, Boreocoreani armis respondebunt - declaravit regimen Phyonyangeum, addens a se securitas navium in terris sibi vicinis tutari plus non posse.

Interea speculatores et USA et Coreae Meridonalis nuntiaverunt fumum industrialem denuo apparere super Boreocoreanam electrificinam nuclearem Yongbyon, significans ibi condensationem uranii pergi. Quae electrificina clausa mansit - secundum pacta internationaliter a regimine communistarum contracta - a mense Iunio 2007 anni.

Scripsit ANL