De via serica saeculi XXI

Pragae pactum magni momenti a praesidente Unionis Europaeae Josepho Emmanuele Barroso et legatis regiminum Azerbaizaniae, Aegypti, Georgiae et Turciae omnium consensu subscriptum est: hoc Unionis consilium est, ut gasum et petroleum toti Europae tutius suppeditetur. Emmanuel ipse "Energiae pretiorum - inquit - celer incrementum aspeximus, negotiatorum lites, fistularum damna: quapropter gasi et petrolei suppeditatio interdum vel intermissa est!". Posthac novae fistulae construendae sunt, nova "serica via" aperienda, novi suppeditatores acquirendi, ut civitates Europaeae aliunde quam ex Russia "aurum nigrum" et methanum sibi comparent. Nullae angustiae in gaso tranportando tum manebunt, cum novae fistulae depositae erunt, quarum maxima Nebucadnezar appellabitur, ex nomine Babylonis praeclari regis: quae gasum ex regione Caspia per Turciam in Europam adferet (descriptio in imagine adponitur): mense Junio proximo pactiones cum Turcarum rectoribus conficientur.

Legati aliarum Asiae civitatum, id est Usbeciae, Kazakistaniae et Turcomeniae, conventui interfuerunt sed pactiones non subscripserunt: quos populos pacta talia adiuvare possint, ad vincula cum Russis remittenda. Etenim Russorum legatis parum consilia Europaeorum placuerunt.

Scripsit Herimannus Novocomensis