EXERCITUS TAPROBANUS NULLAS INDUTIAS DATURUS TIGRIDIBUS TAMILENSIBUS

Pugna usque finem

Regimen exercitusque insulae Taprobanes (hodie ut Ceylonia aut Sri Lanka notae) decrevit se plus indutias non propositurum rebellatoribus gregis Tigridum Tamilensium (LTTE), quibuscum pugnae atroces aguntur in boreali parte insulae. Tales indutias ut regimen pronuntiaret appellavit ante paucos dies Organisatio Nationum Unitarum (ONU) timens de sorte circiter octoginta milium (50.000) civium, qui in regione sub potestate rebellatorum manent. Secundum data ONU, quae pervenerunt in manus diurnariorum agenturae Associated Press (AP), in recentibus pugnis vitam amisisse 6.500 cives Lancanenses cum14.000 vulnerati sint.

Locutor ducum exercitus Taprobani, brigadarius Shavendra Silva dixit se non putare Tigrides Tamilenses sinere hos cives in tutum fugere, nam volunt iis uti sicut 'vivis scutis', sperantes scilicet his praesentibus exercitum non contra se posse omni vi irruere. Secundum regimen Taprobanum, post decisivum ictum contra rebellatores praeterito die Lunae, circiter centum milibus (100.000) civium contigit in regiones tutas effugere. Quod praeteritis nonnullis mensibus contigerat quoque sexaginta milibus (60.000). Zona, quae hodie in potestate Tigridum maneat, putatur esse superficie tantum 12 chiliometrorum quadratorum. Exercitus ac multi rerum militarium periti in terris occidentalibus credunt LTTE non posse vero longius ictus Taprobanorum repugnare.

Repraesentator consilii UNO profugis tuendis, Amin Awad, dixit se nihilominus sperare duces LTTE "aperturos portam orci ac sinere, ut cives terras tutas petant". Quod ut faciant necesse tamen est, addidit Awad, ut regimen Taprobanum indutias novas pronuntiaret.

Ne pugnae porro persequerentur appellavit modo minister primarius vicinae Indiae, Pranab Mukherjee, cuius adiutores in regionem a Tamilensibus occupatam pervenerunt, ut cum ducibus Tigridum de pace assequenda colloquerentur.

Scripsit ANL