CRISIN QUOMODO COHIBERE DUCES G20 DISPUTANT

Grex vicenarius convenit Londinii

Partim clam, sine magno scilicet publico receptu, adveniunt Londinium duces viginti terrarum maximi oeconomice in mundo momenti, ut die Iovis vias ad crisin oeconomicam globalem - quam esse gravissimam ab annis tricenariis praeteriti saeculi constat - cohibendam una quaerant. Quem gregem vicenarium, sive G20, constituunt terrae: Argentina, Australia, Brasilia, Canada, Sinae, Francogallia, Germania, India, Indonesia, Italia, Iaponia, Mexicum, Russia, Arabia Saudica, Africa Australis, Corea Australis, Turquia, Britannia, Civitates Unitae Americae (USA) necnon Unio Europaea.

Vigiles publici Londinenses valde timent de securitate advenientium virorum politicorum, decreverunt ergo eos quasi clam recipiendos esse, sine magna pompa ovationeque in aeriportu aut in viis urbis. Fori (City) Londinensis, ubi conventus fiet, die Iovis magna pars urbis incolis peregrinatoribusque clausa manebit. Nihilominus, biocolytae exspectant catervas antiglobalistarum conventui nocere conaturos. Iam adesse Londinii constat praesidentem USA Barack Obama (hic in photographemate, cum uxore, in aeriportu Londinensi), adsunt etiam dux Russorum, Dmitri Medvedev, et Sinensium, Hu Jintao, qui ambo ministrum primarium Gordon Brown convenerunt.

Diurnarii rerumque oeconomicarum periti rogant, utrum re vera oeconomiae globali conventus Londinensis sit proditurus, non facile enim erit communem sententiam inter viginti participantes invenire. Ita exempli gratia ministra rerum fiscalium Galliae, Christine Lagarde, die Martis minata est se suumque praesidentem Nicolaum Sarkozy sermones conventus relicturos, nisi proposita Gallica commune accipientur. Gallia autem nota est flagitatione, ut fora mundana sub intenationale tutela maneant, ne negotia nimis periculosa aliquo in loco habeantur. Ad talem enim tutelam apud se introducendam multae terrarum G20 nondum paratae videntur.

"Summitatem gregis vicenarii sine dubio minores fructus esse afferturam quam exspectabatur, cum praeterito anno viri politici de tali conventu primum loqui coeperint" - dixit radiophoniae publicae Britannorum BBC Jan Randolf, peritus societatis analyticae Global Insight.

Scripsit ANL