SI TANTUM TEHERAN PROGRAMMA NUCLEARE REICIET

Obama pacem proponit Persis

Praesidens novus US-Americanus Barack Obama pollicitus est Iranianis 'novum initium' relationum inter ambas civitates, si tantum Persia reiciet programma suum nucleare, quo, secundum USA et multas alias terras occidentales, etiam arma nuclearia fabricari possint. Adiutor praesidentis Persarum Mahmoud Ahmadinejad (hic iuxta Obamam photographemate monstratus), Ali Akbar Javanfekr, dixit ducem Iraniae se proposito Americanorum gaudere, quamvis id non satis esse ad iunctiones sanas ambarum terrarum restituendas post tria decennia annorum hostilitatis.

Regimen Teheraniense explanat se condensationem uranii perficere velle tantum, ut vim electrificam fabricetur.

Condiciones, quibus Obama 'bellum frigidum' cum Irania ad finem perducere possit, sint tales:

- Persae non plus facient conamina uranium condensare, pro qua re accepturi sint ex aliis terris iam condensa combustibilia nuclearia ad usum electrificinarum aptata

- Irania porro non suppeditabit arma gregibus rebellarotum Hezbollah (in Libano) et Hamas (in Zona Gazetica)

- Magistratus Teheranienses adiuvabunt agmina internationalia pacem restituere conantia in sibi vicinis Iraquia Afghanistaniaque

- Regimen Persarum non plus minaturus sit exsistentiam civitatis Israhelianae.

Secundum nonnullos analitycos rerum politicarum Proximi Orientis, praesidens USA non fortuito propositum suum divulgavit tempore festi novi anni Iraniensis (Novruz). Sunt etiam qui putant Obamam se socios novos in regione hac instabili quaerere, si casu foedus cum Pakistania rumpetur, ob nimiam in hac terra influentiam bellatorum motus Taleban.

Scripsit ANL