De thalamo autocinetico

Septimana praeterita non longe a Bergomo, urbe Italiae septemtrionalis, custodes publici autocinetis frequenti via transeuntibus invigilantes parvam autoraedam incomposite in media via huc illuc vagantem retinuerunt. Maximo cum stupore virum septuagenarium et mulierem sexagenariam intus fere nudatos ardentissime futuentes compererunt; eodem tempore uxor deprehensi ignara domi erat. Astynomi, postquam ambos vestes induere iusserunt, virum alcoholis vim longe autoraedam ducenti licito maiorem sumpsisse comprobaverunt.

Qui a custodibus ante iudices delatus est, ebrietatis accusatus et facultate autocinetum agendi orbatus; sed ante mulierem suam maiores sine dubio poenas persolvet. HP

Scripsit Herimannus Novocomensis