Se tempore transacto lupanaria eo perlibenter frequentasse, quod ibidem „cum sodalibus se potuisse cubare in natabulo unâ cum nonnullis puellis lascivissimê loquentibus et agentibus. Ibidem semper semperque causae habes, cur rideas et ioceris." At se correptum esse taedio mortifero, quandocumque unam tantum haberet, quam futueret. „Semper cupiebam aliquid extraordinarii et efferatissimi."

Se perlibenter in coetibus desultorum (swinger clubs) nudum assedisse ad cilibantium. At venerem gregalem esse rem discendam. „Paucissimi" Henricus inquit, „viri sciunt rectê facere venerem gregalem. Plerique enim sunt ‚adhaesores’, ut nos aiebamus, qui semper adhaereant ad unam tantum puellam eandemque." Hoc genus veneris haud bene succedere, si particeps sit amica alicuius viri confutuentis amatissima.

Num necesse esset biographiae inserere relationes de fellatione tempore telephonematis factâ, Henricus diurnariis nescivit dicere. Se quidem esse voluptarium virum Rhenanum, cui moechatio esset quoddam genus ambulatiunculae. Haec explicavit Henricus admissarius diurnariîs, qui coniciunt eundem plus mille mulieres futuisse.

Etiam ore libero nec fucato Henricus narrat se per viginti quinque annos fuisse ebriosum. "Mâne horâ undecimâ in cauponam ibam et staminatas ducebam per duodecim horas. Quod partim erat iucundissimum, partim satis taediosum." Potationes nihil esse nisi actionem admodum simplicem, se potasse taedio temporis vexatum."

Praeterea alcohole immodicê sumpto se minus impeditum esse, ne peteret venerem. Potando se, qui indolis esset minus alacris, id assecutum esse, ut mulieribus apertius confiteretur desideria sua voluptuosissima. Tamen ut evitaret ingurgitationes nimis effrenatas, interdum pausas interposuisse. Ex duobus annis se omnino abstinere ab alcohole Henricus Lauterbach dixit diurnariis periodici „Stern".

Ubi alcohol abundaret, nec defuisse experimenta drogas sumendi. Histrio confessus est se cum collegis illustribus sumpsisse potiones, quibus immixtum esset heroinum. At idem peccator experientiâ purgatus affirmat: In tempus longius drogarum sumptionem esse lusionem vanam et inutilem, quae oporteat omittatur. „Equidem istum drogarum abusum vitâ non superavi nisi forte fortunâ."

Hodie Henricus pater duorum filiorum felici connubio cum Victoriâ 33 annos natâ est coniunctus, quae ad colloquium interrogatorium faciendum sineret se photographari maritum tenerrimê circumplexa. At Henrici confessiones scriptas uxor eiusdem non semper videtur agere levi bracchio. „Interdum illa iam nares subduxit aut pedem impulsavit costis meis."