...Aulae Excelentissimi Palatini Chelmensis Legati in Turciam, innotescere attentavi, cum quo Turcicas , sane animo meo exoptabiles perlustrassem Provincias, nisi mihi mox enarranda infortunii quaedam adversitas paucis ante Legati abitum diebus, evenisset. Etenim Illustrissimi Sappiae Thesaurarii Magni Ducatus Lythuaniae, aula tunc temporis in praeurbio Cracoviensi habitantis, nescio quo fato absque omni eis data irae causa, obvium me frameis invasere, quibus quidem sat tremulum gladium in defensionem meam opposui, ast videns majorem contra me frameorum numerum vibrari, ad salvandam vitam in cujusdam Sartoris Poloni domum insilivi. Attamen insequentes me irati & hanc domum invadere, fenestrasque disjicere coeperunt. Ferrea quidem in fenestris cratis insultum furentium prohibens, exoptato munimento mihi fuit; ast nec tamen hic securus fui: per ipsas enim crates adeo me lapidibus obruerunt, ut cumulus lapidum ad medium usque corpus meum accreverit; ubi toto corpore concussus, inter spem & metum positus, nec sensi ex intibus dolorem. Interea ubi jam de vita mea desperavi, uno lapide grandiori tactus sum, crescente calamitate & tumultu illo unam ultra & dimidiam horam durante, etiam obviis in rixas se miscentibus, missa est ad sedandum horum furorem Regia Quardia & ecce utrinque magna strages & plurium caedes ex eo oborta est. Nihilominus quodam muro, quo aliud ostium ad illud, in quo eram, cubiculum, obstruebatur, perfracto, novo lapidum imbre me invaserunt. Tactus in fronte (cujus cicatricem ad mortem retinebo) corrui exanimis. Tunc vero irruentes per illum, quo cinctus fueram, cumulum lapideum me per capillos extraxerunt foras, ubi ad sensum redii, vidi me ab uno raptari capillis per totam ibi aream, qui tamen (mirum!) altera manu evaginata framea, me semiexanimem misertus, defendebat ab aliorum frameis, quamvis non potuerit, quin duo vulnera in capite & unum in manu acceperim. Ipse tamen occasionem praebuit, ut in Ecclesiam Sancti Spiritus moenibus adsitam, insilire potuerim, ubi etiam gratiarum actorias preces Deo ter Optimo Maximo, Angeloque Custodi persolvi, tumultu per plateas adhuc usque ad decem circiter personarum occisionem perseverante. Ob hanc ergo concussionem tum lapidum, tum framearum, sex septimanarum spatio coactus sum, uno eodemque in loco, ad recuperandam sanitatem requiescere. Quievit corpus, verum adhuc animus stimulabatur & acceptis licet hisce Polonorum bellariis, plura experiri statuit optima occasione ulterius invitante; ita, ut jam cum Legato in Turciam, meum proficiscendi ardorem, in Moschovia refrigerandum decreverim.

Bernhardus Tanner, Legatio Polono-Lithuanica in Moschoviam, Norimbergae 1689, cap. 3

Scripsit Bernhardus Tanner