De bello civili Hispanico.

Disputatione ad bellum civile Hispanicum spectante minime implicari volo (c.f. chronicam "Folia" Johannis Oleastrensis); sed "reverentiam" pro eis, qui eo in bello vitam amiserunt, patefacio meam. Addo haec qualiacumque: duo viri Pisaurenses pro Hispania, etsi in acie adversa ut milites voluntarii pugnando, sanguinem effuderunt; alter, nomine Bruno Lugli (1901-1937), pro Republicanis et defendendo urbem 'Villanueva del Paradillo' mortem obiit; pro Francisco Franco alter, cui nomen Washington Serafini (1910-1937) [nos Pisaurenses dicimus 'Vasinto'], m. Dec. a. 1937 prope urbem 'Teruel', nisi de urbis nomine me fallit memoria, vitam amisit. Duabus inscriptionibus et cuiusdam plateae titulo memoria Brunonis Lugli recolitur; at nihil est hac in urbe, quo sacrificium Washingtonii memoretur. Huius viri amicus quidam senex (n. a. 1911) pluries a municipii Pisaurensis admninistratoribus petivit ut etiam Serafini, cui ob virtutem in bello Italico-Aethiopico (1935-1936) praebitam duo nomismata- aeneum et argenteum- adtributa erant, inscriptione vel brevi commemoretur. At frustra, una cum aliis Pisaurensibus, amicus petivit. Fortasse notior est Dorinus Serafini (1909-2000), 'Vasinti' frater: <http://tinyurl.com/8rnel>
Haec tantum ad historiae fidem observandam addidi.

Scripsit Victorius Ciarrocchi