Annus
2 0 0 6


Untitled Normal Page

DEESSE SANCTUM NICOLAUM BEFANAMQUE?

Ultimo die Solis ante Natalem Domini tempore missae sacrae in basilica Comensi habita, perterritis puerulis obstupefactisque parentibus, archiepiscopus Alessandro Maggiolini pronuntiavit deesse sanctum Nicolaum! Non satis hoc, dixit enim: Deesse sanctum Nicolaum, deesse etiam Befanam! (La Befana, quae ab epiphania nomen ducit, maga est, qua semper in hominum memoria, 6 Ianuario mane, festa scilicet Trium Magorum, solebat pueris Italianis dona apportare). Adesse tamen infans Jesus - addidit Maggiolini.

Verbis Maggiolini valde perturbati Comenses aliorum regionum episcopos Itaianos alias in hac re sententias proferendos exspectant...

In Auckland tamen Neozelandensium turba 40 ebriatorum sanctorum Nicolaorum in tabernas mediae partis urbis irruperant, ubi bonam Natalem omnibus optantes merces varias eripuerunt, pro quibus non solventes evanuerunt.

 

Wayne Rooney, pedifollista ille manus Manchester United, maxime nota omnium persona est pueris Britaniae - patet ex indagatione opinionum a societate Luton First peracta. Magis notus quam Rooney Deus solus est, athletam autem sequuntur, in ordine: Jesus Christus, David Beckham (etiam pedifollista Manchester United) et regina Elisabetha II.

---------------------------------

OMNIA MIRA MIRANDA in scriptis variis, tum veteribus cum novissimis, inventa:

Unde vinum venit?

Difficile dictu est, unde orta sit cultura vitis viniferae, uvas praebentis, ex quibus vinum faci potest. Pro loco natali habetur generaliter Caucasus Meridionalis, regiones inter hodiernos terras Turciam, Armeniam et Iraniam. Ibi, in fine deluvii adpulsavit arca Noe, protoplasti illius potatorum. Et quae coincidentia rerum! Si credendi sunt scientistae Sovietici, ad montem Ararat, inter reliquias lignorum acaciae - non autem cedri, in Libano viventis - quae ligna oriri possunt e nave magna, inventae sunt magnae amphorae fictiles cum carbonato faece meri. (Maguellone Toussaint-Samat, Histoire naturelle & morale de la nouriture, pars III, Histoire du vin)

Porro eadem: Terra Chanaan condita est a filiis Cham, cui Noe maledixerit ob irreverentiam erga temulento patre. (ib.)

Meminerimus autem uvas maximi momenti fuisse ad terram Chanaan a Moyse et Aaron aestimandam, qui iussu Domini exploratores in hanc misserunt, qui... pergentesque usque ad Torrentem botri, absciderunt palmitem cum uva sua, quem portaverunt in vecte duo viri. De malis quoque granatis et de ficis loci illius tulerunt, qui appelatus est Nehelescol, id est Torrens botri, eo quod botrum portassent inde filii Israel. Reversique exploratores terrae post quadraginta dies, omni regione circuita, venerunt ad Moysen et Aaron et ad omnem coetum filiorum Israel (...) et narraverunt dicentes: Venimus in terram, ad quam misisti nos, quae re vera fluit lacte et melle, ut ex his fructibus cognosci potest. (Num. 13, 24-28).

Maximus tamen potator omnium athleta praeclarus Milo ille Crotonensis erat, qui decem litras vini cottidie bibisse creditur. Cui tamen potatio finem malam paravit, nempe nimiam in vires sui spem credere sinens, nam... cum iam natu grandis artem athleticam [Milo] desisset iterque faceret forte solus in locis Italiae silvestribus, quercum vidit proxime viam patulis in parte media rimis hiantem. Tum experiri, credo, etiam tunc volens an ullae sibi reliquae vires adessent, inmissis in cavernas arboris digitis, diducere et rescindere quercum conatus est. At mediam quidem partem discidit divellitque; quercus autem in duas diducta partis, cum ille, quasi perfecto quod erat conixus, manus laxasset, cessante vi rediit [quercus] in naturam manibusque eius retentis inclusisque stricta denuo et cohaesa [arbore], dilacerandum hominem feris praebuit. (Gellius, Noctes Atticae, 15, 16)

 

Scripsit



Retro ad:

Novissima editio
Summum paginae