CIVITAS IUDAEA ALPINA?

Praesidens Iraniae Mahmud Ahmadinesad, qui ante duos menses ad Israheliam a charta geographica delendam appelavit, nunc novam sollutionem quaestionis Iudaeae proponit: migrandi sint Israhelienses in Germaniam et Austriam! Nam - explicat praesidens - si vero haec ambae terrae talia horribilia Iudaeis tempore alterius mundani belli affecerunt, decet iis nunc duas tresve provincias victimis suis pristinis donum dare, ut ipsi Palaestinos persequi desinere possint, terram eorum relinquentes. Hoc modo quaestio Iudaea ad ipsos rei fontes sit revertenda ibique solvenda. Incertum tamen remanet, de quibus provincis agatur (verisimiliter de limitaneis Bavaria et Tyrolia?), nec explanat Ahmadinesad, quid sit cum Theodiscis Austriisque ibi viventibus faciendum.

HAEDUS IN FLAMMIS

Idolatris urbis Sueticae Gaevle hoc anno, sicut in multis praeteritis, denuo male evenit: gigantaneus haedus stramenticius, quem ante tempus Natalicii ultimis in 40 annis in media urbe ponere conantur, modo combustus est! Quae combustio iam in 22 annis eveniebat, astynomis numquam fere incendiarios prehendere contigit. Nunc credunt illi unum incendiariorum vestibus sancti Nicolai indutum esse, hoc modo quasi tutum suspicionis ad idolum accessisse. Altitudine 13 metrorum effigies haedi decies tantum ad tempus Natalicii permansit; praeter incendia, semel ab autoraeda eversa, anno autem 1977 ab ignibus artificiosis male directis denuo incensa est. Per nonnullos annos septimi decenni praeteriti saeculi incendiarum fessi magistratus effigiem ponere prohibuerant, incolis tamen id poscentibus, morem restituerunt.

MUSULMANI ARBOREM NATALICIAM DEFENDUNT

Arbores nataliciae ingratae sunt hoc anno praesidibus 70% societatum commercialium Britannorum, quia in officis positae tolerantiae fidei noceant, non-Christianorum scilicet animas laedentes - patet ex effectu indagationis duorum milium societatum. Cui rei maxime reclamavit... moderator Summi Consilii Musulmanorum Britannorum Iqbal Sacranie, dicens neminem eorum aliquid contra arbores natalicias habere at praesides societatum verisimiliter hoc modo impensas tantum arboris ornamentorumque eius emendorum vitare conari.

Macropodes, animalia illa miranda Australiae, timent sonitus terram ab ipsis pede pulsandi, qui sonitus eorum naturales sunt se invicem de periculo appropinquante certiores faciendi. Hac scientia nitens, vult doctrix Helena Bender universitatis studiorum urbis Melbourne megaphonia instituere prope agros a macropodibus saepissime vastatos, ita ut sonitus terram pede pulsandi e taenia magnetophonica emissi macropodes frugipetas ab agris abigant.

Lupanar, ubi viri mulieribus officia praestent, aperire vult in civitate Americanorum Nevada Heidi Fleiss, cognomine Hollywood Madame nota, quae possidet iam nonnulla lapanaria luxuriosa, ubi tamen Venus colitur more adhuc talibus in locis solito - discimus ex actis "Newsweek". Lupanar novum instar castelli est struendus, cum marmorea aula receptionis necnon 20 domibus Bengalicis, ubi 20 Adonides suas Veneres Proserpinasque expectabunt necnon 250 dollariis per horam libenter tempus cum iis una terant.

Apprehensa est mulier Zingara, quae in regione Novgorodensi Russorum furta vi hypnosis perficere solita sit. 46 annorum Zingara a vigilibus prehehsa est, postquam ab accola vici Mosenskoie nuntiatum iis esset illam ab hac mutuum dare 700 rubelos (quod aequatur circa 23 dollarios USA) poposcisse, cui rei, quamquam noluerit, hypnosi victa minime recusavit.

Ad tempus indefinitum prohibetur mori civibus oppidi Biritba Mirim, prope ad urbem Sancti Pauli (Sao Paulo) Brasilianorum positi. Prohibitionem magistratus ediderunt, sperantes eo modo pecuniam sibi a regimine allici ad novum coemeterium struendum; vetus enim plenus mortuorum iam est.

Vicus Clark Americanae civitatis Texas per decem proximos annos nomine DISH nuncupabitur, eodem ut societas telehorasica quaedam Americana. Pro hac licentia societas DISH omnibus 125 habitatoribus vici gratis aditus in programma suum datura est necnon instrumentum ad plicas generis DVD auscultandas. Multi timent, ne hoc modo via aperiatur maioribus societatibus (ut Coca-Cola, General Motors, McDonald's) incolis maiorum urbium, quarum nominibus omnes aliquot assueti sumus (ut New York, London, Paris), similes condiciones proponendi.

52.7 litras vini bibit unoquoque anno medius quisque Francogallus, dum medio Indo 5 mililitras per annum satis sunt - nuntant acta Polonorum "Forum".

Pretia pilulae Viagra necnon preservativorum vult ministerium fiscaliorum Cypri sportulae statisticae expensorum civium addere, ubi merces maximi homini momenti (sicut cibus) teneantur. Quae sportula ad verum statum vitae civium aestimandum valde in disciplina statistica prodest. Aliae res, quas ministerium sportulae Cypriorum addere vult, sint licentia venadni necnon aqua vitae.

Regimen Rei Publicae Africae Meridionalis prohibuit stationibus radiophonicis televisificisque carmina emittere, quae viros ad fraudem uxoris adhortentur. Carmina talia enim incremento naturali nationis obstent - putat minister rerum internarum Fidele (nomen omen?) Ngoundgika. Mulieres huius terrae maxima libertate utuntur: usque ad quattuor ab uno viro in matrimonio possunt esse ducendae, necnon iam ab anno 1986 licentia suffragandi fruuntur.

Scripsit Nanomopoufos