01
COMPETITIO TENILUSORIA
Pater dicitur veneno imbuisse 27 adversarios filii filiaeque suae
Hôc tempore in quodam iudicio Francogallico agitur de gravissimo exemplo ambitionis parentalis immodicae: Vir 45 annos natus accusatur, quod 27 adversariis filii filiaeque tenilusoribus clam dederit medicamenta sedativa. Unus ex imbutis est mortuus.
Monte Marsani ex urbe – Investigatores quantum invenerunt, reus forti medicamento angores impugnandi usus erat, ut infirmaret tenilusores, qui essent contra Maximum filium Valentinamque filiam suam lusuri.
Post aliquod certamen tenisiae (Angl. tennis) magister quidam 25 annos natus illo medicamento imbutus infortunium autocineticum passus erat mortiferum. Reo, cuius nomen est Christophorus F., patri familias quondam *helicopterîgae exercitûs Francogallici, imminet custodia viginti annorum. Causa iuridica incohabitur d.10. m.Mart.
Christophorus autem in suspicionem non venerat ante infortunium illud mortiferum. Denique astynomi invenerunt iuvenes 6 viros et 21 mulieres puellasque, quas reus imbuerat medicamento. Filia Christophori illo tempore 13 annos nata relata erat in numerum Francogallicarum tenilustricum summae spei.
Hanc relationem d.01. m.Mart. a.2006 in periodico „Der Spiegel" inventam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/
Scripsit Nicolaus Gross
|
