d
d.10. m.Iul. a.2006
VISITATRIX EXOTICA
Serpentem irrepsisse in lectum coniugialem
Serpens, cui nomen est zoologicum Elaphe guttata, solet vivere in Americâ septentrionali – praeter litus a Mexico usque ad civitatem foederalem Vassintonianam situm. At nuper talis serpens a patriâ aberrans invasit in provinciam Badenianam. Ibidem autem maritum uxoremque e somno excitavit vehementissimê.
Ex oppido Lörrach – Uxor gravida tam vehementer territa est, ut unâ cum medico summae necessitatis vehenda esset in nosocomium. Sed interim medici rettulerunt illam aliquatenus refectam esse. Etiam eiusdem mulieris infans nondum natus videtur nullum detrimentum cepisse.
Astynomi oppidi Lörrach in Badenio-Virtembergâ siti nuntiaverunt illam bestiam nocte ante diem Lunae irrepsisse in lectum paris coniugalis. Postea serpentem se abdidisse post cubiculi dormitorii armarium, ubi capta esset ab astyphylacibus.
Elaphe guttata (qualis ab herpetologis appellatur haec serpens suffocatrix, non venenata) longitudine est maximâ unius metri quadraginta centimetrorum; in Germaniâ saepius colitur in terrariis. Astynomi opinantur hanc serpentem aut e terrario possessoris effugisse aut ab eodem esse expositam. Elaphen guttatam nunc ad tempus aliquantum receptum iri in zootropheum.
Hanc relationem d.10 m.Iul. in periodico „Der Spiegel" inventam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: ///www.leolatinus.com/
Scripsit Nicolaus Gross
| 
