De Castellionis Florentini hebdomada sancta

In plurimis vicis et urbibus Italiae varie celebratur quotannis hebdomada sancta, id est memoria dierum supremorum Iesu Christi. Traditiones per saecula servata usque ad tertium millennium aevi Christiani pervenerunt, studiosorum necnon periegetarum curiositatem excitantes.

Castellione Florentino (Castiglion Fiorentino), in oppido Tusco, tres pompae hebdomada sancta habentur. Martis die comprehensio Iesu in horto Gethsemani commemoratur, Mercurii die vero flagellatio: nonnulli etiam nunc meminerunt viros, qui pompae intererant, semet flagellis et scuticis verberare, sed hodie tantum pedum nuditate qui iter faciunt laborant. Veneris die mors Domini commemoratur.

Media denique nocte post sabbatum, simul ac presbyterus Gloriam canere coepit, omnia sodalicia vici, quae ad hoc convenerant, statuam Christi resurrecti immoderato cursu per mediam templi navem usque ad altare maius vehunt, populo exsultante tubis campanisque resonantibus, dum in foro iuvenes pyrobola lusoria dirumpunt. Quibus celebrationibus hoc superadditur, quotannis tragoediam de passione et morte Iesu ab histrionibus agi.

Scripsit Herimannus Novocomensis