Loca follimania intacta

Maritus tuus furore pedifolii captus omnino de te hoc mense non curat? Noli desperari, non sola es in mundo - "viduae certaminis mundani" multis in locis Europae his diebus una congreguntur!

Solis 99 libris per diem (vino Campaniensi necnon parvis esculentis inclusis) habitare exempli gratia potes in Kettering Park Hotel & Spa oppidi Anglorum Northamptonshire, ubi unius rei certa otio frui possis: non singulum quidem televisorium certamina pedifolli monstrabit. Similem luxuriam praebet Ladies Power Weekend Basileae Helvetorum pretio 72 euronibus per noctem tantum. Societas autem aeroviaria Easy Jet volatus mulieribus tantum praebet in insulam Gozo, ubi nemo de furore pedifolii audiat.

In Anglia, Grand Hotel Brighton pollicitur nullum rumorem de certaminibus effectibusque eorum in aedibus eorum auditum fore, dum Linthwaite House Hotel in regione Lacubus (Lake District) dabit tibi poculum Campaniensis gratis si casu operarium aliquem deversorii aemulationem follis spectantem viseris. In televisoriis deversorii his septimanis "Diarium Brigitae Jones" aut "Mulierem pulchram" spectare poteris, nihil de folle.

At maxime quiete a pedifollio frui possis in Helvetia - pagina www.myswitzerland.com/en/movies/wm quattuor Adonides monstrans tentat: Carae puellae, cur non veniatis tempore certaminis mundani in terram, ubi viri minus de folle at plus de vobis curant?

Nullum tamen locum nec ullam paginam interretialem invenimus, ubi viris follimania non captis (adsunt tales!) asylia praebeantur...

Scripsit Krakauer