Redire (Volver)

Hispania - anno MMVI

Produxit: El Deseo S.A., distribuit: Warner Bros.

Direxit et in scaenam traduxit: Pedro Almodóvar

Comediam egerunt: Penélope Cruz (Raimunda), Lola Dueñas (Sole), Yohana Cobo (filia Paula), Chus Lampreave (matertera Paula), Blanca Portillo (Agustina), Antonio de la Torre (Paco), Carmen Maura (Irene)

Imagines curavit: José Luis Alcaine, scaenas curavit: Salvador Parra, musicam composuit: Alberto Iglesias, pelliculam extruxit: José Salcedo.

Omnibus, qui Petrum Almodóvar diligunt, praebet auctor pellicularum Hispanicus mirabilem margaritam, obsequium muliebri genio offerens. Titulum auctor imposuit plura evocantem, "Redire": de reditu agitur ad loca et memorias pueritiae, ad propinquos amatos qui aetatam puerilem frequentaverunt; de reditu mortuorum ad vitam, mortem devincentium: de reditu denique ad cinema femininum, unde auctor Hispanicus coeperat.

Duo loca pelliculae sunt: hodierna urbs Madritum et La Mancha, regio rustica ubi moderna et antiqua artis nexibus vincta simul vivunt. Coepit fabula in sepulcreto, ubi mulieres laeto animo sepulcra virorum confricant: haec imago optime totam narrationem in se cogit, ubi feminae et vinculum terrae memoriaeque dominantur. Raimunda, a venusta Penelope Cruz (quam in imagine aspicis) acta, aëriportus Madritensis purgatrix, cum Paco viro deside ac potore et Paula adolescente filia vitam arduam agit; cuius soror Sole ut comptrix domi laborat. Puellarum matertera Paula, mulierum matris soror, admodum senex in longinquo vico rustico, unde ambae ortae sunt, aegrota iamque demens mortem exspectat, cui humanissime servit accola Agustina. Viri et senioris Paulae obitus omnium feminarum vitas mire commutabunt, facinora et arcana praeteriti temporis illustrantes, usque ad inopinatam finem - quam hic enarrare non oportet - spectatorem perducentes.

Pellicula de memoria in perpetuum a mulieribus tradita leviter disserit: nullum spatium viris relinquitur, vivida autem amicitia et societas feminarum fabulam intexit, aetatum continuitatem confirmans. Etiam de praeteriti temporis locis agit auctor, qui pueritiam degit in rusticis vicis regionis, quae La Mancha appellatur: ubi non dum evanuit fides, mortuos minime domos et propinquos deserere, sed vincula arcana cum vivis servare, quibus tamen terrorem inicere nolunt.

Inter omnes eminet ab initio usque ad finem Penelope Cruz, mulier mediterranea aspectu, quam Almodóvar praeclararum Italicarum histrionarum modo effingere voluit, Annam Magnani expressis verbis citans; sed etiam Carmen Maura, annos provectae avae optime partes egit.

Quam pelliculam ut aspiciatis valde exhortor.

Scripsit Herimannus Novocomensis