Historia mundana investigationis clandestinae sive ignotae res gestae secretorum speculatorum, eorum rationes agendi necnon armatura ultimis 4000 annis adhibiti

Bonus atque efficax speculator per totam sui vitam et ultra ignotus manet. Mundus de speculatoribus audit tunc demum, cum iis aliquid male contingeret, sed etiam in talibus casibus plerumque historiam rei distortam obtinet. Ut dixit dux generalis Americanus George C. Marshall: munus secretum secretum semper manet. Hanc ob rem bonum librum de arte speculatoria aliter nisi fictam rarissime invenies. Exceptum memoratu dignum est liber Janusz Piekalkiewicz, rerum gestarum periti Poloni, nuper in vicina Slovakia in lucem editus.

Imprimis terreatur lector extensione operis: res gestae 4000 annorum non facile est describere etiam in spatio 568 paginarum. Auctor tamen optimam proporionem sequi videtur inter res technicas descriptas (armatura investigatorum, usque ad usum satellum speculatorium) et biographias speculatorum maximi in historia momenti. In his seape monstrat Piekalkiewicz homines non solum optime eruditos callidissimosque, sed etiam patriotas veros civitati omnino deditos, mori pro patria non timentes.

Magno usui lectoribus erit index haud parvus aliorum auctorum operum de hac re tractantium, qui cupientibus initium esse potest amplioris studii disciplinae speculatoriae.

Est liber Piekalkiewicz opus "litteraturae facti", quod tamen sicut optima fabula Romanica legitur.

Janusz Piekalkiewicz, Historie svetove spionaze. Domus editoria Nase vojsko, Bratislaviae 2004.

Scripsit Nanompouphos