Ignatius de Loyola (1491 - 1556)

Nobilis Hispanicus, novissimus duodecim liberorum, Ignatius de Loyola (Iñigo López de Recalde) puer regius fuit Ferdinando et Isabella regnantibus; ab anno aetatis suae XXVI miles, pro patria sua multa stipendia fecit. Cum autem die XX mensis Maii MDXXI, sub moenibus Pompeiopolis (Pamplona) globo ferreo ex ignivoma ballista proiecto percussus, gravi cruris vulnere laboraret, plus quam semel "Auream fabulam", quae de vita sanctorum narrat, et "Christi vitam" Ludolphi cuiusdam perlegit. Quae lectiones cum diuturna solitudine eum penitus converterunt.

Vixdum validus, votum castitatis fecit et gladium suum ante altare Beatae Virginis Montis Serrati (Montserrat) suspendit: viatoris vestem induens, biennio in specu solus viam ad Christiane vivendum exquisivit, deinde Romam et in loca Christianis sancta peregrinator se contulit, ubi muslimos ad fidem convertere conatus est. Anno MDXXVIII Barcinonae theologiae studere coepit et Lutetiae Parisiorum anno MDXXXIV doctor renuntiatus est. Die XV mensis Augusti eiusdem anni "Constitutiones Societatis Iesu" perfecit, meditationes suas orationes visiones intellectum in unum colligens; probatio summi pontificis post annos septem concessa est.

Cum Ignatio Jacobus Lainez, Alphonsus Salmerón, Nicholaus Bobadilla, Simon Rodriguez, Peter Faber et Franciscus Xavier primi sodales novae Societatis fuerunt: numquam sese Jesuitas appellaverunt, quod verbum ut contumeliam ab inimicis creatum hodie superbe ipsi sodales usurpant. Ignatius per Europam et loca sancta peragravit, Romae denique sedem Societatis supremam direxit: ibi pridie Kalendas Augustas anni MDLVI fere caecus mortem obiit. A pontifice maximo Gregorio XV anno MDCXXII canonizatus, commemoratur ab ecclesia catholica Romana, ut mos est, die mortis suae.

Hodie XXX milia virorum Societatem Jesu constituunt et quingentae universitates et ludi ab Jesuitis reguntur. Non desunt hodie etiam obtrectatores, qui proverbium Latinum excogitaverunt: "Si cum Jesu itis, non cum Jesuitis": nam ut superbi a multis reputantur. Ignatius de Loyola Vasconum regionis et militum patronus habetur. Hanc Latinam orationem ex scriptis eius excerpimus.

"ANIMA CHRISTI, sanctifica me.
Corpus Christi, salva me.
Sanguis Christi, inebria me.
Aqua lateris Christi, lava me.
Passio Christi, conforta me.
O bone Jesu, exaudi me.
Intra tua vulnera absconde me.
Ne permittas me separari a te.
Ab hoste maligno defende me.
In hora mortis meae voca me,
Et jube me venire ad te, ut cum Sanctis tuis laudem te

In saecula saeculorum. Amen."

Scripsit Herimannus Novocomensis