DE SOPHIAE SCHOLL SUPREMIS DIEBUS
DE SOPHIAE SCHOLL SUPREMIS DIEBUS
Sophie Scholl - Die letzten Tage 
Rexit Marcus Rothemund
Julia Jentsch .... Sophie Magdalena Scholl
Fabian Hinrichs .... Hans Scholl
Gerald Alexander Held .... Robert Mohr
Johanna Gastdorf .... Else Gebel
André Hennicke .... Richter Dr. Roland Freisler
Florian Stetter .... Christoph Probst
etc…
Anno MCMXLII, secundo bello mundano furente, Monaci, in urbe maxima Bavariorum, parvus grex discipulorum universitatis resistere constituunt regimini nazistarum, quod copiis saevissimis Europae terras iamdiu vastat iamque campos internecionis ad populum Iudaeorum delendum aedificare coepit. Auctor pelliculae Marcus Rothemund, qui scripta et documenta usque ad murum dirutum in Germania Orientali servata perlegere potuit, tertio cinema de "Candida rosa" - ita folia antinazistica ab iuvenibus subscribebantur - confecit, post Michael Verhoeven (De candida rosa) et Percy Adlon (De quinque postremis diebus): tragoedia filmica ergo nos certiores facit de interrogationibus et iudicio reorum.
Incipit narratio impressione foliorum, quorum diffusione prosequitur a Sophia eiusque fratre Iohanne per atria et scalas universitatis, deinde omnia sine intermissione ad destinatum fatum properant, usque ad ferrum capita recidens: mihi venit in mentem de nonnullis Aeschyli tragoediis, quarum in primis versibus catastrophe tota continetur, ubi fere nihil accidit, nisi explicatio fati voluntatis. Longa colloquia Sophiae cum tribuno Gestapo Roberto Mohr calliditatem puellae in mendaciis creandis ostendunt, deinde fortitudinem in opiniones et veritatem declarandas et confirmandas, pretio etiam vitae; dulcia verba cum femina communistica in eadem cella seclusa humanitatem et vitae amorem; iudicium ante iudices "populi" tribunalis denique invictum animum et contemptum vitae: quapropter re vera herois Germani populi facta est. His omnibus fides Christiana pura et adamanti simillima additur, quae paucis sublimibus verbis expromitur. Non effugiant spectatorem minores personae (verbi gratia custodes universitatis et carceris, milites, patroni ad reos defendendos vocati ....) qui plurima exempla praebent plebis imbellis, qua regimen Nazistarum viguit.
Pellicula mirabilis brevitate, optime ab histrionibus acta, spectatores penitus saepissime movet, quamquam artificia auctoribus consueta nullo modo invenias: vis pelliculae solum in veritate demonstrata residet. Merito Berolini duo praemia cinemati huic tributa sunt.
Scripsit Herimannus Novocomensis
|
