Ne pulsatum veneris!

(Don't come knocking) (F, D)

Direxit Wim Wenders

Comoediam agunt: Sam Shepard (Howard), Jessica Lange (Doreen), Tim Roth (Sutter), Gabriel Mann (Earl), Sarah Polley (Sky)

Scripserunt: Sam Shepard et Wim Wenders

Ad comoediam reduxit: Sam Shepard

Imagines curavit: Franz Lustig

Distribuit: Mikado

Produxerunt: Reverse Angle Production, Arte France

Wim Wenders direxit hanc pelliculam cinematum longinqui Occidentis desiderio refertam, cogitationem tamen de dilacerata vita saeculi primi et vicesimi praebentem. Narratur hic arduum iter Howard Spence, actoris cinematum USAe "Occidentalium" (western), ad vitam praeteritam alcohole mulieribus vitiis plenam detegendam: repente scaena cinematis deserta, in Butte, parvum vicum solitudinum civitatis Montanae, nullo vestigio relicto confugit. Ibi filium et filiam, quos inscienter ex duabus feminis generaverat, invenit: quorum alter (Earl) patrem repellit, furorem et odium in ignotum genitorem mira cum vi demonstrans, altera (Sky) suavi cum humilitate amicitiae desiderium demonstrat. Cum denique Howard, a sollerti legato societatis quae damna cinematis interrupti producenti praestat, in scaenam pristinam invitus rediit, spes amoris fraterni in parvo vico Montanae manebit. Loca deserta, asperi montes, limpidum caelum, candidae nubes etiam comoediam agunt, concentus more solitudinem et absentiam cuiusvis amicitiae vel propinquitatis ostendentes, magis cogitationum quam verborum commentarium.

Nulli licet sine radicibus superesse, neque vitam sine poena dissipare: hoc edocere videntur Wim Wenders et Sam Shepard, qui simul fabulam scripserunt. Effingit vitam suam actoris Howard, postquam vitam veram avide et sine regula consumpsit, mulieribus concumbens easque mox deserens, ignarus se vim generandi et facultatem amandi habere: sed tempus effugit neque parcit: Cum denique fragmenta dispersa agnoscere et colligere conatur, nihil illi relinquitur, minima spes posteris humanioris vitae.

"Cur tam diu exspectasti?" interrogat Sky. "Quod ignorabam tempus transire." respondet Howard, vita consumptus. Hoc cinema non praestans, non mirabile opus est, sed ad meditationem spectatorem impellit, praesertim post finem visionis.

Scripsit Herimannus Novocomensis