ARINGUS FERMENTATUS SUETORUM SIVE SURSTRÖMMING

Qualis esca maxime omnium olet? Casea varia Francogallorum? Caseolum illud Olomoucense Bohemorum? Minime! Aringus fermentatus Suetorum, ipsorum lingua surströmming qui nominatur.

Iam Romani Graecique, frigidariis carentes, sucum ex intestinis piscium fermentatis saleque maceratis extractum, cui nomen garum, ad omnem fere escam ut conditionem addere solebant, hoc modo et gustum acriorem cibi reddentes et insecta vel alia microbia nociva ab escam odore eius horribili repellentes. Hodie tamen mos pisces fermentare tantum in Asia Orientali necnon in Suetia servatur.

Mense Aprili in septentrionali parte Maris Baltici, ubi aringus eximii gustatus habitare creditur, copiae horum piscium captantur, qui postea, sale sparsi doliisque impositi, per tres quattuorve menses sole expositi remanentes bene fermentantur. Deinde, hodiernis saltem temporibus, pyxidis in metallicis aringi hi occluduntur, ubi per unum plus mensem manere debent, fermentatione paululum lentius progrediente, ita ut mense Augusti, cum demum pisces edi possint, pyxides satis rotundati fiunt (si diutius quam per sesquennium tenentur, displodere etiam possint).

Et tunc res maxime difficilis – pyxidem aperire. Fetor enim tam iniucundus emittitur, ne quo te vertas vero scias (multi odorem hunc similem stercoris caninis describunt). Mos igitur est pyxides foris aperire solosque pisces domum apportare ubi statim, aqua currente lauti, manducentur. Nonnullis urbibus leges adesse aiunt pyxides surströmming in insulis habitaculorum, nisi in aqua demersas, aperire prohibentes.

Excruciationes tamen nasi sapore piscium incredibili, licet perversitate pleni, compensari dicuntur. Quibus gluttire surströmming contigit – nam non omnes Sueti quidem tantis extremis se reddere queunt – credunt se in paradiso glutonum per momentum temporis fuisse. Solum tamen aringum nemo edere possit, comitari pisciculus debet potatis (pomis terrestribus) recentibus coctis, cepa secata cruda atque flore lactis acidato seu caseo quodam. Editur quoque surströmming quadrae tenuissimae panis hordeacei superpositus. Praeter florem lactis bibitur ad aringum cerevisia necnon aqua vitae generis, qui etiam Suetice "Aquavit" dicitur.

Unoquoque anno surströmming alio aliquantulum sapore evenire a peritis creditur. Ruben Madsen, praeses Academiae Surströmming (adest talis Holmiae!), dicit hornotini aringi gustum nimis intentum proinde modis Wagnerianis similem, praeteriti autem anni tenuiorem, Chopinianum quasi fuisse.

Scripsit Nanompouphos