Annus
2 0 0 6


De oryza cum cucurbita concocta

De oryza cum cucurbita concocta

Cucurbita maxima non tantum ad vacua capita die festo "Halloween" appellato perficiendas, sed etiam ad iura tempore hiemali coquenda adhibetur. Parum plerumque sapida est, sed cucurbita maxima rotunda viridi cortice (imaginem adpositam conspice), cui Italici nomen dederunt "marinam Fossae Clodiae" (Italice: marina di Chioggia) ex urbe illa ad litus Hadriaticum, sapido ferculo cum oryza comparando utilis est.

Ad ferculum quattuor convivis perficiendum emantur

cucurbita maxima ut supra haud minus unum chiliogramma pondo,

dimidium chiliogramma oryzae sativae crassis granis,

unum hectogramma butyri,

dimidium hectogramma contriti casei Parmensis Regiensis,

nonnihil caepae resectae, dimidium poculum vini albi, ius bovinum vel cubo paratum, sal et myristicam fragrantem (Anglice: nutmeg).

Cucurbitam maximam in quattuor partes cultro divide, in furnum iam torridum (e. g. CC gradibus centigradis ferventem) pone, XLV vel LX minuta exspecta, donec dentiscalpium facile in pulpam penetret, deinde corticem semina fibras cultello aufer, pulpam in lance furcula contunde. Dimidiam partem butyri in olla caleface, caepam resectam infunde ac paululum frige, dein oryzam superfunde et cochleari ligneo commisce; cum oryza ollae adhaerere coeperit, vinum infunde donec vaporet, dein paulum iuris et cucurbitae pulpam superadde, interdum commisce et ius infunde. Post quartam vel tertiam (ut mavis) horae partem, ex igne ollam abstrahe reliquumque butyrum atque caseum contritum infundantur et accurate commisceantur, operculum imponatur et quinque minuta sine ulla calore quiescat cibus. Suam quisque lancem repleat, mirysticam fragrantem si libet super ferculum conterens.

Simul vinum rubrum fervidum bibatur, verbi gratia Italicum "Lambrusco" aut "Gutturnio" ex Padana valle.

Scripsit Herimannus Novocomensis



Retro ad:

Novissima editio
Summum paginae