Mecum esto! (Be with me)

Singapura - anno MMV

Direxit: Eric Khoo; in scaenam traduxit idem cum Wong Kim Ho; imagines curavit: Adrian Tan; musicam delegerunt: Kevin Mathews et Christina Sham; produxerunt: Zhao Wei Films atque Infinite Framework.

Partes maximi momenti egerunt: Theresia Poh Lin Chan, Ezann Lee, Samantha Tan, Seet Keng Yew, Lynn Poh.

Theresia Chan, mulier Sinensis videndi atque audiendi facultatibus ab adolescentia orbata, minime vita se abdicare voluit: de qua suimet partes agente narrat haec mirabilis pellicula filmica, quam in certamine cinematographico Locarnensi ostendit auctor Eric Khoo. Theresia in forum mercatorium ambulat, sibi fercula parat, caecos pueros docet, narrationem vitae suae scribit, voluntatem denique mirificam vitam cotidie vivendi demonstrat.

Quid autem extra obscurum et arcanum universum Theresiae in hoc cinemate invenimus? Ecce narratio suavis ac fera duarum puellarum vehementi mutuo amore vinctarum, quibus nuntii breves per telephona mobilia transmissa, verbis sententiisque contractis, fere sola via communicationis sunt: amor plerumque captivitati tactusque timori similis est; cum autem communicatio haec muta silere coeperit, amor ipsaque vita evanescent. Ecce custos corpulentus atque timidus, qui frustra litteras amatae suae scribere conatur et verba apta in libro epistolarum iam confectarum requirit. Ecce viduus maestus, qui fercula Sinensia coquendo tantum consolationem invenit.

Has omnes personas in ultimis imaginibus singulariter connexas comperit spectator, qui domum quaestiones perdifficiles de proximitate inter homines et amicitia secum feret: arduum est communicare, tam periculosum quam conventus in tenui ponte ad diruendum parato, unde in fluctus desperationis decidere possis, pondere oneratus imperitiae nuntium ferendi. Sed spes tenuis volentibus manet: mecum esto!

Scripsit Herimannus Novocomensis