"Imagine illa photographica non modo sex milites Americani, dum quodam in monte Iaponicae insulae 'Iwo Jima' vexillum ipsorum proponere contendunt, verum etiam eorum vis ac virtus ac Patriae studium repraesentatur", quondam dixit Ioe Rosenthal, qui die 23 Febr. 1945, dum in illa insula strenue Americani et Iapones proeliantur, photographema illud impressit.
Nudius tertius Iosephus, qui quartum annum supra nonagesimum expleverat, mortuus est eumque placet imaginari cum illis sex militibus collocuturum, quorum nomina sunt: John Bradley, cui verba adtribuuntur haec: "Non quia vexillum illud nos sustulimus, sed veri heroes ii fuerunt, qui mortui sunt"; Franklin Sousley, qui nondum viginti annorum vitam eis in proeliis amisit; Ira Hayes, qui Indoamericanus erat; Harlon Block; Mike Strank, qui manipulo illorum militum iusserat ut mons 'Suribachi' expugnaretur; René Gagnon, tunc duodeviginti annorum, qui anno 1979 mortuus est. Neque obliviscendi sunt, unâ cum aliis circiter septem milia Americanorum in illa insula occisorum, milites Iapones, qui duo et viginti milia erant:
usque ad mortem pro Patria adeo fortiter pugnarunt, ut eorum ne milleducenti quidem superstites fuerint.

Plura de illis pugnis, quae in 'Iwo Jima' insula per quadraginta paene dies mensibus Februario et Martio a. 1945 acerrime proeliatae sunt, legi possunt in pagina hac:
<http://www.iwojima.com/>
nec non in libro 'Iwo Jima', quem James Bradley (Ioannis filius) et Ron Powers conscripserunt (Italice: apud Rizzoli, Milano, 2005; ISBN 8817005665).
De photographo Ioe Rosenthal:
<http://tinyurl.com/kbczm>

Scripsit Victorius Ciarrocchi