Festung Breslau sive arx Wratislaviensis

Est primum ver 1945 anni, Wratislaviae. Capitaneus Eberhard Mock, 62 annorum detector biocolytarum (privatim cynicus et sybarita) investigationem pergit obscurissimi stupri necnon mortis iuvenis mulieris, consanguinea comitessae Gertrudis de Mogmitz. A Februario exeunte urbs, iussu dictatoris Adolphi Hitler mutata in arcem, obsessa est a Copiis Rubris; in obsidione usque ad diem 6 Maii permanebit, quattuor diebus longius quam Berolina. Habitatores urbis-arcis moriuntur centimatim; cui bono tunc aenigma unius tantum necis sit solvendum? Capitaneo Mock tamen - qui ipse vulneratus est in obsidione cuiusque gesta inter ambo bella mundana peracta lectores Poloni bene sciunt e tribus libris Marci Krajewski, scriptoris iuvenis Wratislaviensis (qui huius urbis in universitate munere magistri philologiae classicae fungitur) - hic ultimus casus Wratislaviensis res meri honoris est. Continget ei solvere hunc casum antequam bestiae rubristellariae urbem invadent et postea administratores Poloni totam eius populationem expellent?

Marcus Krajewski, anno 1966 natus, in schola, ut alii (etiam auctor huius symbolae, anno 1965 natus), didicit Wratislaviam esse, fuisse et semper fore urbem Polonam atque "occupationem Theodiscam" brevem tantum digressionem fuisse. Urbs ipsa tamen docebat aliter, inscriptiones in ecclesiis, in ruinis aedium nondum a clade 1945 anni restructarum, in operculis ductuum subterraneorum cloacarum (quod et auctor huius symbolae, annis 1984-87 frequens urbis visitator, testatur). Suspicione ductus Krajewski coepit investigare secreta temporis (modo) praeteritis Wratislaviae et in investigatione hac ita progressus est, ut hodie par fere esse peritus rerum Wratislaviensium videatur senibus huius urbis civibus exsulibus, in Germania vitam degentibus, comparatus.

Liber maximi momenti omnibus, qui genios loci exstare credunt.

Marek Krajewski, Festung Breslau

Domus editoria W.A.B.

Varsoviae, 2006

Scripsit Nanompouphos