Annus
2 0 0 6


Radio America

Amicus planitiei (A Prairie Home Companion)

USA - anno MMVI

Produxerunt: Robert Altman et alii

Direxit Robert Altman (USA 2006)

In scaenam traduxit: Garrison Keillor

Comoediam egerunt: Woody Harrelson (Lefty), Tommy Lee Jones (Axeman), Garrison Keillor (se ipsum agens), Kevin Kline (Guy Noir), Lindsay Lohan (Lola Johnson), Virginia Madsen (femina periculosa), John C. Reilly (Dusty), Maya Rudolph (Loretta), Meryl Streep (Yolanda Johnson), Lily Tomlin (Rhonda Johnson).

Pelliculam exstruxit: Jacob Craycroft, imagines curavit: Edward Lachman, scaenas curavit: Dina Goldman, vestes curavit: Catherine Marie Thomas

Garrison Keillor per annos XXX emissionem radiophonicam Sancti Pauli (St. Paul), in civitate Americana Minnesota, cum musicis et histrionibus in theatro quodam duxit. Ut tricesimum annum spectaculi celebraret, Robertum Altman praeclarum cinematum auctorem suasit, ut pelliculam filmicam de desinendo spectaculo conficeret, cui nomen idem atque emissioni tribuit, id est "Amicum planitiei" (Prairie Home Companion): inde Altman miram pelliculam creavit, multis personis refertam, praeteriti temporis cupidam, ironia maculatam: radiophonia ibi ut locus ingenii communisque memoriae effingitur.

Narrat fabula Garrison Keillor postremo ante spectatores se offerre, quod theatrum delendum ibique autoraedarum tectum exstruendum sit: tum omnes histriones musici operarii cantatrices (quarum pulcherrima et inopinata Meryl Streep) post scaenae parietes atque ante populum ostenduntur, cum Garrison Keillor ipse, ut magister spectaculi omnia genera musicorum Americanis dilecta (country, folk, gospel, jazz) canit, praeconia recitatu impossibilia ad crustula vel fascias adhaerentes venumdanda interponens. Sese quisque ante microphonia demonstrat, nihilo differt persona ab homine. Mihi venit in mentem de "Nashville" summa opera auctoris Altman, ubi res et fabula, ars et vita in unum conformantur: haec mihi America placet. Lectoribus hanc pelliculam commendo.

Scripsit Herimannus Novocomensis



Retro ad:

Novissima editio
Summum paginae