ISLANDIA - CUVAITUM COELI BOREALIS?

Ante 20 annos, cum geologi Islandiani thermometrum in perfossionem terrae aere tantum et aqua expletam prope ad oppidum Reykjanes immersissent, rem omnino inopinatam invenerunt: thermometrum, quod calores usque ad 380 graduum Celsii pati debeat, liquefactum est! Meo iudicio calor ibi 400 vel 500 gradus attigit! - dicit Gudmundur Omar Friedleifsson, redemptor, cui vocatio est energiam e visceribus terrae eripere, a diurnario actorum Bohemorum "Hospodarske noviny" percontatus.

Quomodo id fieri potest? Facillime, nam in altitudine 1000 et plus sub terra metrorum pressio aeria tam magna est ut non sinet aquae effervesci, sed eam in statu liquido tenet. Immo plus altius, inter 3000 et 4000 metra - quo operarii societatis domini Friedleifsson hoc anno "advenire" (instrumentis scilicet, non corporaliter) sperant - sub pressione 200 et plus bariorum aqua caloris 200 graduum Celsii in statu 'supercritico', id est semi liquido semique vaporario, appareat. Si rivus talis materiae ad rotas aquarias movendas electrificinae parvae ibi a Friedleifsson structae applicari possit, electrificina haec electricitatem 50 megawattorum loco hodiernorum 5 MW producat.

Addici hic liceat Islandiam - insulam, quae geologice pars novissima totius mundi est - maximam in orbe terrarum copiam thermoenergiae in visceribus orci possidere. Circa 90% omnium domuum Islandicarum iam vapore geisirico calefaciuntur; fontes geothermales 54.5% desiderii energetici totius terrae supplent.

Sed non tantum hic spes lucri domini Friedleifsson ponitur. Aqua "supercritica", ad rotas movendas iam adhibita, facilius disiungi debeat, ita ut sine auxilio carbunculi hydrogenium purum obtineatur. At hydrogenium verisimiliter alimentum futurum ignis maxime per totum mundum in usu erit, post annum 2020 - ut credunt studiosi - una cum biolignis (ex sacharo e.g. extractis) contra combustibilia fossilia (i.e. petroleum, methanium et carbonem) bono cum efectu aemulans. Hac in disciplina denuo Islandia princeps mundi monstratur - per viam urbis capitalis Reykjavik iam nonnullas laophoras experimentales hydrogenio utentes versari. In 50 et plus annos, campis petrolearis Sinus Persicae iam maxima e parte consumptis, fiet fortasse Islandia novum Cuvaitum...

Scripsit Krakauer

Scripsit Krakauer