SCANDI ALSULEGII VICTORES

Solis die eodem ultimo Olympiadis hiemalis Taurini Italorum habiti in certamine finali alsulegii glacialis Sueti vicinos suos Finnos proportione portarum 3:2 superaverunt. Praeterito autem die de nomismate aenea pugnabantur Russi cum Bohemis; his illos vincere contigit 3:0.

Rebus ita evenientibus diceres - Bohemis actualibus principibus mundi exclusis - "homines novos" in stadio glaciali hac Olympiade triumphasse, Canadianis Americanisque, id est victoribus aurei et argentei nomismatis praeterita Olympiade in Salt Lake City habita, nunc domum iam ante semifinalia petentibus. Similiter, altera tantum in memoria vice evenit, ut Russi sine ullo alsulegii nomismate ludos olympicos reliquerint.

Gymnasiarchus Canadianorum Wayne Gretzky se a munere abdicandum statim pronuntiavit. At iuste - respondent diurnarii commentatoresque - ille enim manum nationalem ita collegit, ut usque ad octo tribunos manuum ligae NHL contineret; solis autem ducibus, militibus in praecinctu praesentibus nullis, moleste sit pugnandum.

Americani autem in rebus technicis causam cladis quaerunt: stadium enim glaciale Taurini quattuor metris latius sit quam stadia, ubi certamina NHL habentur, alsulegiariis ergo Americanis Canadianisque huic rei insuetis difficilius esset curare, ne quidam hostium ad portam eorum perrumperet. Accidit, quod desunt ludis Olympicis pausae inter tertias, quae in certaminibus ligae Americae Septentrionalis habentur, ut praeconia commercialia nuntientur. Hae pausae alsulegiariis 1-2 minutas requiei adportare solent, quo auxilio Taurini omnino Americani privabantur.

Scripsit Krakauer