Cinaedorum nuptiae Arabicae
ARABICI PHYLARCHATŪS UNITI
Cinaedos Arabes nuptiarum causâ damnatos esse
In Arabicis Phylarchatibus Unitis complures viri damnati sunt ad custodiam quinorum annorum. Iisdem obiectum est, quod praeparassent „nuptias multiplices" paribus cinaedorum inter se amantium destinatas. 
Dubaiano e Regno – Agentura nuntiorum dpa ad iuridicos Dubaienses provocans nuntiavit undecim viros condemnatos esse propter nuptias cinaedicas praeparatas, reum tertium decimum propter „obscaenitatem" punitum esse custodiâ annuâ. 26 viris causam fuisse dicendam, 14 autem ex iis esse absolutos.
Hic grex cinaedorum arrestatus erat in deversorio regionis Ghantut eremiticae, iuxta viam autocineticam inter Dubai et Abu Dhabi sitam. Nonnulli cinaedi referuntur fuisse faciebus fucatis, vestibus muliebribus. Ceteri induti fuisse vestibus Arabicis generis more traditi.
In islamicis phylarchatibus homosexualitas punitur legibus Draconêîs. Paucis demum diebus ante quidam vir damnatus erat ad custodiam quinque annorum, quod alteri viro stuprum intulisset. Tamen magistratûs minimê miseruit viri, qui stuprum passus esse contenditur: Iudices enim iudicaverunt, ut idem (qui est extraneus) verberaretur et e Regno expulsaretur.
Hanc relationem d.13.m.Febr. a.2006 in periodico „Der Spiegel" inventam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: ///www.leolatinus.com/
Scripsit Nicolaus Gross
|
