Annus
2 0 0 6


83

Aegyptum poculum pedifollicum Africanum vicisse

Grex pedifollicus Aegyptius poculum Africae a. d. IV Idus Februarias, adversariis Litoris Eburnei postremo certamine summae punitionis calcibus (penalties) profligatis, sibi comparavit: nam quattuor puncta sibi collegit, adversarii duo tantum. Strenue a lusoribus Litoris Eburnei pugnatum est, quibus in stadio Memphidis (Cairo) tolerandus fuit animus hosticus LXXV milium spectatorum Aegypti fautorum.

Ab initio prudentia in campo praevaluit, quarta et tricesima tamen minuta Amr Zaki, qui Aegyptiis paenultimo certamine victoriam contra Senegal comparaverat, fere pilam in rete coniecit; post quinque minutas paulum afuit, quin Kolo Toure rete gregis domestici penetraret. Pausa vix peracta, bis rete Eburneum periclitatum est. Altero certaminis tempore declinante, grex Aegyptius maximas difficultates sustulit: qui septuagesima sexta minuta ab adversario Drogba, qui in grege Britannico Chelsea primo in agmine certat, fere devictus est. Pilam in rete tertia atque octogesima minuta Aegyptius Amr Zaki coniecit, sed arbiter Tunetanus Mourad Daami punctum irritum censuit.

Postquam tempora regula constituta atque additicia frustra transierant, calcibus summae punitionis victoria gregi domestico tributa est: nam dicti lusoris Eburnei Drogba ictus a retis defensore El Hadary repulsus est. Maestis ducentis Eburnei Litoris fautoribus domum cum grege suo redeundum fuit.

11/02/2006

Scripsit Herimannus Novocomensis



Retro ad:

Novissima editio
Summum paginae