03
SPECTACULUM PALAEOAUTOCINETICUM
Psittacos arceri a pugnatoribus caraticis
In Neo-Zelandiâ quidam psittaci, quibus nomen est „Keas", famosi sunt propter cupiditatem suam cummis et chromii arrodendi. Ubicumque hi montium incolae curiosissimi apparent, autocinetistae timent de fenestellarum densaturis cummeis affligendis, birotarii montani de cummeis canthis. Itaque nunc dispensatores spectaculi palaeoautocinetici (Oldtimer rally) luctatores caraticos iubent arcere has aves molestissimas. 
Wellingtonio ex urbe – Organisatores spectaculi palaeoautocinetici taedet impetuum, quos facere solent psittaci in autocineta. Iidem psittaci montani circiter 50 cm longi, qui referuntur inter aves orbis terrarum omnium intelligentissimas, curiositate suâ molestae fiunt omnibus biotopi sui invasoribus – eheu quot et quanta ornamenta chromica fenestellarumque densaturae cummeae ab istis psittacis iam sunt destructae!
Die Veneris NZPA agentura nuntiorum Neo-Zelandica nuntiavit 40 pugnatoribus caraticîs fore prohibendum, 140 palaeoautocineta per vicum iuxta montem Cook in insulâ australi situm vectura ne quid detrimenti capiant curiosîs psittacîs chromium cummemque arrodendi cupidîs. Pugnatores autem a dispensatoribus spectaculi palaeoautocinetici conductos participes esse coetûs caratici.
Dionysius Callesen, praepositus deversorii prope siti dixit verisimile esse viros illos athleticae pugnatoriae peritos non adhibituros esse solitas artes suas. Amatoribus bestiarum non esse timendum, ne psittaci vapularent. Pugnatoribus nihil fore faciendum nisi fugandum.
At Ray Bellringer astynomus regionis dubitat, num bene succedat methodus psittacos more caratico fugandi. Vix fieri posse, ut psittaci fugentur a pugnatoribus caraticis. "Qui" inquit, „circumvolantes ridebunt". Optimê arceri psittacos curiosos pistoliîs aquaticîs.
Hanc relationem d.03. m.Febr. a.2006 in periodico „Der Spiegel" inventam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: ///www.leolatinus.com/
Scripsit Nicolaus Gross
|
