De Urano et de chaos circum eundem planeten

Novas imagines longinqui planetae Urani nuper reddidit et per rete mundanum divulgavit apparatus telescopicus Hubble, a studiosis USAe in remotas regiones systematis solaris directus. Primum anno MCMLXXXVI vehiculum indagationibus addictum "Voyager - 2" appellatum, a NASA eiectum, plures satellites et anulos Uranum circumverti ostenderat; nunc constat, posquam caeli studiosi per apparatum Hubble accuratius planeten aspexerunt, summatim tredecim anulos et quinque et viginti satellites (vel lunas) Uranum circumvehi.

Duae lunae nuper repertae Mab et Cupid (quae nomina a comoediis W. Shakespeare abstracti sunt) appellatae sunt: quarum prior, XXIV chiliometra lata, paulatim dissolvitur, pulvere alens anulum, quocum circiter centum milia chiliometrorum a superficie planetae distat; altera, cui nomen Cupid attributum est, interiorem gyrum percurrit, eiusque diametros XVIII chiliometra tantum patet. Hoc tamen studiosi obstipuere, quod hi duo satellites non solum in orbem sed etiam sine ratione circumvehi. Quam ob rem luna Cupid, cuius orbis parum a circuitu lunae multo maioris Belindae differt, in ipsam mox decidere poterit (illud "mox" in caeli studiosorum sermone miliones annorum sonat); satelliti alii in superficiem planetae Urani ipsius ruendum esse reputatur.

Haec lunarum condicio "haud stabilis", cuius mutatio singulo gyro planetae - qui annis LXXXIV perficitur - observari licet, chaos saepius quam ante cognitum comperiri demonstrat: quod nova et mira facta forte gubernata abhinc revelare possit.

Scripsit Herimannus Novocomensis