De mercatura mundana et digno labore

Quiquid Consilium Ordinis Mundani Mercaturae (WTO) in urbe Sinarum Hong Kong deliberaverit, sine dubio ullo fiducia populorum beneficiorum mercaturae universalis valde affecta est: si autem civium amor erga commercium omnibus vinculis solutum evanuerit, desiderium veterum finium resuscitari poterit. Quamquam conventiones Ordinis Mundani Mercaturae a paucis comminus observentur, omnes sollicitudine moventur, ne nimia libertate mercaturae vita cotidiana peior fiat: quod ad universitatem reiciendam nonnullos retrorsum impellere possit.

Qui libertatem commercii collaudaverunt, prosperitatem et dignitatem omnibus polliciti sunt: quod minime evenit, neque Ordini ipsi Mundano Mercaturae cordi esse videtur. Interea deletae regulae minime securos illos, qui salarium accipiunt, fecerunt, quam ob rem usquequaque verentur operarii, ut laborem amittant: cum in divitibus civitatibus decrescit numerus illorum, qui merces producunt - quibus difficillimum est alterum laborem invenire - etenim in Unione Europea, recentioribus annis, mille millia operariorum textilium laborem suum amiserut, quod censent studiosi in omnibus officinis futurum esse; tum in inopibus civitatibus plerique operarii peius quam antea vivunt et laborant, praesertim in regionibus mercibus exportandis dicatis, ubi mulieres diutissime operam dant nec societates ad iura sua defendenda condere possunt. Nulla lex neque de tributis aeri publico reddendis neque de salute operariorum tuenda observatur, miserrime vivunt qui laborant, nulla beneficia "miraculi oeconomici" antea promissa accipientes: Non sufficit enim operam dare, nisi ad vitam dignam vivendam salarium sufficit. Innumerabiles sunt, qui miserrime laborant, sine ulla regula neque ulla securitate futurae vitae tutandae. In Asia mille miliones hominum duo thalera aut minus cotidie lucrantur, quibus sibi consulere non possunt; atque duo miliones quotannis ob morbos laboris condicionibus genitis vitam amittunt. In toto orbe duodecim miliones vi ad laborandum coguntur, quorum nonnulli ad servitutem reducti sunt; item CCL miliones puerorum.

Rebus sic stantibus, quis diffidentia populorum liberae mercaturae obstupescat? Civitatibus, quae Ordinem Mundanum Mercaturae constituunt, favor populorum conquirendus est, ut iustitia in oeconomicis rebus ubicumque servetur et ad aequitatem ut ad omnium propositum spectetur. Iustitia et aequitas hoc significat: iura operariorum observari, mulieres tamquam viros coli, tutelam et pactiones recte haberi. Ordo Mundanus Mercaturae suadeat civitatibus, ut leges ad laborem tuendum observentur! Nullus coactus labor toleretur neque adultorum neque puerorum, vigeant contra libertas societates condendi, interdictio praelationum omnium, leges ad rerum naturam incolarumque salutem protegendam.

Quae omnia minime excogitata sunt ad oeconomiam Nordicarum civitatum protegendam, sed legitima vindicatio sunt dignitatis humanae, progressus socialis et iustitiae. Si iuste commercium et labor acta erunt, melius omnia habebuntur.

Hoc scriptum, a Poul Nyrup Rasmussen, praesidente Factionis Socialisticae Europeae, cum aliis confectum, in actis diurnis Francogallicis "Le Monde" die XVI mensis Decembris MMV editum, convertit Herimannus Novocomensis.

Scripsit Herimannus Novocomensis