Ne ignoretur Africae Cornu

Postquam dictator Siad Barre anno MCMXCI expulsus est, Somalia atque chaos verbum idem fuerunt. Plures multa conati sunt ad legem et ordinem restituendum: Americani anno MCMXCII auxilia miserunt, Ordo Nationum Unitarum colloquia convocavit ut regimen ad tempus constitueretur, copiae Aethiopiae praeteritis septimanis cum islamicis armatis (quorum unus in imagine aspicitur) de summa rerum contenderunt. Ceterae nationes, consciae tametsi periculorum quae re publica in Cornu Africae deleta oriri possent, ad nullum diuturnum exitum pervenire potuerunt; idem dicendum est et de recentissimis factis et de USAe pristina expeditone "ad spem restituendam" (Restore hope).

Castigati sunt Americani, cum duo helicoptera deciderunt et duodeviginti milites vitam amiserunt. Regimini Somalorum, post biennia colloquia creato, factionibus dilacerato in urbem Baidoa confugiendum fuit; moderatores vero Aethiopiae sperant ordinem talem in Somalia nunc creatum esse, quo colloquia ad potestatem partiendam inter ministros et familias islamicas haberi possint. Sed minus credibiles auctoritates Somalorum hoc factae sunt, quod ad invisos proximos recurrerunt; fuga vero islamicorum eos etiam fide minus dignos efficit. Unde potestas "belli dominorum" iterum crescere possit.

Rectoribus tamen Aethiopiae bis Somali minitantur, et vindicatione regionis Ogaden et bello sancto occidentalibus hostili sicut in Afganistania et Iraquia contra Christianos Aethiopicos. Familiae islamicae, quae mensibus aestivis caput Somaliae expugnaverant, Baidoa etiam totamque regionem occupare potuissent, legem sacram "sharia" appellatam ubicumque proclamantes, nisi exercitus Aethiopiae - cui quapropter gratiae agendae sunt maximae - solus retinuisset.

Occupatio tamen aut potestatis vacationem aut colloquendi facultatem praebet; copiae nunc ad pacem tuendam ab Ordine Nationum Unitarum mittendae sunt, si Somalia ex perturbationum feritate servanda est: hoc primum munus erit ONUs secretarii nuper electi Coreani Ban Ki-moon. Nemo de difficultate civitati tam miserae et rixosae pacis inferendae dubitat, sed minime obliviscamur Osamam bin Laden Somaliam novissimam terrorismi occasionem appellasse: ceterum factionum lites nihil fausti promittunt. Civitatum Americae Unitarum tum expeditio cum auxilium militiis Mogadishu cum islamicis dimicantibus allatum nihil profecerunt. Neque aliter de Aethiopum expeditione exspectandum est, nisi mox copiae ab ONU missae pervenerint, ut tenuis spes pactionum inter regimen et familias islamicas praevaleat. Operae pretium est, neque populorum illorum tantum commodi causa.

Hoc scriptum, in situ interretiali www.telegraph.co.uk die XXIX mensis Decembris MMVI nullo auctoris nomine adposito editum, in linguam Latinam conversum est.

Scripsit Herimannus Novocomensis