Ipso die Dominico, ipsâ Româ in urbe sacrâ istaec mulier iterabit spectaculum suum. Madonna cantrix iter faciens mundanum spectaculo suo in odium incurrit Ecclesiae Catholicae. Coram 75.000 (septuaginta quinque milibus) Italianorum eadem mulier duobus diebus pendebit e cruce speculis confectâ necnon tamquam Iesus geret ‚coronam de spinis’.(Matth.27,29). Relator actorum diurnorum Britanniae, q.t. Mirror, affirmat hoc spectaculum esse „lapidem fundamentalem", quem Madonna 47 annos nata supponeret programmati suo.

At virîs Vaticanîs Madonnae spectaculum parum placet. Ersilio Tonini Cardinalis dicit istâ re blasphemicâ contaminari crucem Iesu, et bene scit in hac re sibi assentire Papam Benedictum.

Archiepiscopus Ravennas 86 annos natus, qui propter animi sui lenitatem appellatur „Cardinalium Mater Theresia", nunc postulat, ut cantrix Americana ex Ecclesiâ Catholicâ excludatur. Cardinalis irâ incensus diurnario illius „Mirror" dixit haec: "Satanistae quoque male abutuntur rebus sacrîs in missîs suîs nigrîs. Haec cantrix sequitur illos."

Num Madonna est catholica? Nonne eadem sequitur Iudaeicam doctrinam mysticam? Reverâ Madonna baptizata et educata est ritu catholico, sed annîs nonagenariîs exeuntibus se adiunxit motui Cabbalae Iudaeico. Tamen eadem numquam formaliter se exclusit ex Ecclesiâ Catholicâ.

His diebus Madonna opprobriis Vaticanorum opponit magna opera caritatis suae futurae annuntianda. Nam haec cantrix dicit se velle Africanos parvulos orbatos adiuvare compluribus milionibus dolariorum. Madonna relatori horrei nuntiorum Americani, c.t. Time, dixit se iam ex annis quaeritare „aliquod inceptum magnum, cui adhaerescam summîs viribus".

Ex quo tempore sibi ipsi esse liberos, se mundum aliter considerare; itaque: „Equidem ipsa" inquit „sentio me esse responsabilem parvulîs huius mundi". Hac autem sententiâ eadem videtur congruere cum communitate suâ religiosâ. "Cabbala cum alia tum praecipuê nos docet nos in hanc terram allatas esse, ut alios homines adiuvêmus".

Regina musicae popularis conquirere vult tres miliones dolariorum Americanorum (i.e. ferê 2,4 miliones euronum). Praeterea ipsa dare vult unum milionem, ut fiat cinêma documentarium, quo monstrêtur egestas flebilis parvulorum orbôrum in Malaviâ degentium. Porro Madonna unâ cum Godefrido (Jeffrey) Sachs, directore programmatis Unitarum Nationum millennarii, praedisponit inceptionem, qua in quodam vico Malaviano methodi agriculturae et cura valetudinis publica fiant meliores.