Quaedam mulier Aequatoriana, quae voluit Barcinone volare Matritum, cum aeroplanum suum cum alio confudisset, incidit in errorem Ulixêum. Nunc eidem mulieri exspectandum est in quodam aeriportu Poloniae.

Varsoviâ Cracoviâque ex urbibus – Mulier epibata 30 annos nata Barcinone falsum aeroplanum inscendisse, at non attigisse Matritum, sed Cracoviam urbem in Poloniâ australi sitam hodie refertur a relatoribus stationis Polonicae radiotelevisificae. Austro-Americana cum intellexisset se erravisse, primo recusavit, ne ex aeroplano escenderet. Nam speravit se eodem aeroplano reverti posse in Cataloniae metropolin.

At infeliciter accidit, ut aeroplaniga proximum destinatum peteret Londinium. Itaque mulieri Aequatorianae nunc usque diem crastinum exspectandum est in aeriportu Cracoviensi. Postea demum volabit proximum aeroplanum versus Barcinonem. Cum peregrinatrici ratihabitionis (i.e. visa) experti non liceat aedificium aeriportûs relinquere, societas aeronautica promisit se eidem praebituram esse cibos cubiculumque.