Monaco ex urbe Bavariae – Rummeniggeus a relatoribus Monacensium actorum diurnorum, q.t. „tz" dixit haec: „Mamucianos certiores fecimus iisdem desistendum esse ab Oweno petendo. Alioquin nos adibimus Fifam unionem pedifollii universalem. Non licet coetui pedifolliari lusorem petere, nisi is coetus assentitur, qui cum illo lusore fecit contractum".

Simul Rummeniggeus iterum affirmavit sententiam coetûs pedifollii Germanici victoris, qua illum lusorem Anglum nationalem usque ad annum 2010 contractu Bavarico obligatum non amissum iri ad Mamucianos. "Nos non agimus more Hammaburgensium, qui Khalidum Boulahrouz semel petitum statim amiserint, sed nos sumus Bavari. Nos nemini cedimus, hîc decernit operae conductor, non locator".

Quod verisimile est coetum Bavariae pedifolliarem die Saturni in sortilegio ipsius phasis gregalis illius „Champions-League" primum non fore in situlâ sortium primâ, hoc praeceptor Bavarorum patitur animo quieto: "Hoc non est incommodum valdê magnum, nam quacumque ratione nostro gregi attribuetur alter grex coryphaeus. His duobus annis praeteritis nobis ludendum fuit contra gregem Iuventutis Taurinensis, quia eiusdem sors fuit in situlâ secundâ".