PROCAX COMMENDATIO COMMERCIALIS
Carne caninâ mulieres pulchrescere
Quaedam popina Pyongyangio in urbe Coreae borealis principe sita, ubi specialiter paratur caro canina, in dies a pluribus frequentatur mulieribus. Quare? In causâ est procax quaedam commendatio commercialis. 
Seulo ex urbe – A diurnariis quibusdam Iaponibus coquus eiusdem popinae Boreocoreanae refertur contendere carne caninâ comesâ cutem fieri molliorem atque pulchriorem. Ex eo tempore in dies plures mulieres frequentare popinam cynophagam Pyongyangio in urbe Boreocoreae principe sitam.
Ryu Jong Mok coquus popinae princeps affirmat escam, quae appelletur „caro dulcis", continere magnam copiam vitaminorum A et B et ad problemata digestoria habere effectum salutarem. Ubi primum convivas spectaverint cutem popinae coquorum collaboratorumque, eosdem pro certo habere effectum cosmeticum.
Caro canina comeditur in Austrocoreâ et Chinâ et Vietnamiâ et in Philippinîs et in terrâ Laoticâ. At tutores bestiarum ex longo iam tempore flagitant, ut interdicatur carnis caninae venditio.
Hanc relationem d.9.m.Aug. a.2006 in periodico interretiali „Spiegel online" inventam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/
Scripsit Nicolaus Gross
| 
