De futuro Japoniae quaedam

Nuntiatum est populum Japonicum aetate iam superavisse Italos. Ex totius orbis terrarum nationibus Japonia nunc iam aetate maior evasit, cum magna pars totius populi Japonici (plus quam viginti per centum), annos sexaginta-quinque vel plus habet. In Italia numerus hominum a sexagesimo anno et supra paulo minus quam viginti per centum est. Magistratui nunc Japonico magnae curae est ne natio eorum, quae in rebus oeconomicis secundum in toto orbe terrarum obtinet locum, gradatim nimis diminuatur.

Dixit dominus Kuniko Inoguchi, rebus publicis moderandis administer, cui commissum est munus his de rebus aliquid prospiciendi: "pro viribus operam navaturi sumus diligentem super hanc difficultatem." Propter labentem filiorum generationem senescentemque populum magistratus Japonici sollicitantur decrescente cotidie operariorum numero et diminuente vectigal et tributa.

Iuxta censum anno MMV habitum numerus populi Japonici decrevit qua de causa, ruinae metu consternatis ministris publicis, diversis legibus ferendis nunc cogitant mulieres Japonicas hortari ut plurimos pariant filios. In vicis atque urbibus habent sedes vicinarias quorum munus est foedera matrimonialia Japoniensibus hortari.

Attamen, anno MMV nati sunt tantummodo 1.25 filii per centum ex mulieribus Japonicis, quae ratio media (1.25), non sufficit ad populi numerum sustinendum. Saltem 2.1 per centum requiritur ut numerus populi ne labatur (fugaces dum labuntur anni).

Numerum totius populi Japonici nunc aestimant circa 128 milliones, ex quibus circa 27 milliones aetate seniles sunt. Anno tamen MML ex singulis tribus hominibus, unum plus quam 65 annorum aetatis fore aestimant.

Scripsit Andreas Lanius