ETAm arma deponere statuisse

Eta, grex terroristicus Bascorum, contra regnum Hispaniae iamdiu repugnans ad libertatem populi Basci adsequendam, arma a Veneris die deponet: hoc adnuntiaverunt tres ETAe pugnatores, facie atque capite velatis, ante vexillum societatis eloquentes, in pellicula filmica actis diurnis commissa, "ad mutationem democraticam promovendam, ut abhinc iura populi agnoscantur et quaevis optio politica explicari possit". Mulieris vox tantum audita est. Discessus ab armis stabilis esse dicitur.

Prudenter post nuntium ante senatores locutus est moderator summus Hispaniae Zapatero: nam plus quam semel ETA iam intermissionem violentiae adnuntiavit. Ab observatoribus hoc maxime collaudatur, gregem terroristicum de perpetua robori renuntiatione et de civilibus optionibus elocutum esse. Omnes sperant, post finem belli civilis Hibernici, hanc etiam fontem discordiae caediumque in media Europa siccatum iri, ita ut democratiae more omnes dissensiones disputationibus et comitiis tantum abhinc dirimantur.

Scripsit Herimannus Novocomensis