De tumultu iuvenum in tota Gallia

Iovis die centena milium iuvenum per vias et fora totius Galliae contra novam legem, a rectore supremo Dominico de Villepin ad laborem iuvenum increscendum latam, vehementer reclamaverunt: ex qua minores XXVI annos nati per annos duo ab incepto labore sine ulla causa a domino dimitti poterunt. Legem ingratam non solum iunioribus sed etiam ceteris civibus Galliae confirmatum est per opinionum explorationem. Ante fores celeberrimae universitatis Lutetiensis, quae Sorbona appellatur, cuius aedificia per aliquot dies occupata sunt, discipuli saxa et vitreas lagoenas contra custodes publicos coniecerunt, qui aqua saliente et vaporibus lacrimogenis responderunt. Similia in octoginta urbibus totius Galliae facta sunt: praeter Lutetiam maximae turbae iuvenum Massaliae, Burdigalae, Gratianopoli (Grenoble), Augustoriti (Limoges) et in urbe maritima Le Havre vias occupaverunt.

Veneris die praeses Gallorum Iacobus Chirac, sollicitus de civili discordia, adfirmavit rectores paratos esse de lege tam acriter impugnata colloquendo omnesque ad moderationem hortatus est: nam die Saturni societates operariorum et discipulorum Lutetiae Parisiorum amplissimum concursum reclamantum convocaverunt, quo sperant unum milionem hominum conventurum esse.

Scripsit Herimannus Novocomensis