Copias ad pacem servandam missas in Darfur diutius mansuras esse.

Unio Africana constituit copias in Darfur, regione Sudaniae, ad pacem tutandam missas usque ad finem mensis Septembris operam suam daturas esse, donec Nationes Unitae munus idem accipiant; sic in capite Aethiopiae Addis Ababa Unio Africana et Consilium securitatis ONUs deliberaverunt. Rectores Sudaniae summae rerum traditioni adversantur, multitudo autem vias Khartoum implevit, bellum sacratum contra "novos colonos", id est ONUs milites, comminatus: pecuniam illam, qua ad commutandas copias Nationes Unitae usurae sint, copiis iam missis muniendis adhibeat. Iam duobus milionibus hominum patria derelinquenda fuit, sed moderatores negant se cohortes Arabicas Janjaweed, quae pessima scelera bello furente perpetraverunt, adiuvisse.

Nisi autem inteventui ONUs Sudaniae rectores consenserint, eorum consilia observabuntur, quamvis amicitia Sudaniae et Chadiae ob parva certamina et abigeatus rebellium apud fines corrupta sit ideoque parva proelia ibi facta sint. "Spero vim et genocidium in Darfur ad finem vergi" ait ministra USAe rebus exterioribus addicta Condoleezza Rice, sed Nationes Unitae adfirmant pacem "unguibus" retentam esse Arabicasque militias campos exsulum et raedas auxilia afferentes continuo adortas esse. Etiam adiutores ab ONU missi periculo instante aufugiunt. In dies difficilius est cibaria ceteraque auxilia profugis secure tradere.

Observatores autem reputant difficillimum rectoribus Sudaniae esse mutationem cohortium recusare.

Scripsit Herimannus Novocomensis