Annus
2 0 0 6


96

Sodalem Milosevic manu suapte sibi mortem conscivisse

Milan Babic, qui Serbos Krajinae contra ceteras gentes eiusdem regionis bello Jugoslavo duxit, mortem sibi ipse in carcere Batavo conscivit, ubi poenas solvebat: nam ad tredecim annorum captivitatem condemnatus erat. Se facinorum perpetratorum pudere ac poenitere confessus erat. Quomodo vitam amisisset celaverunt auctoritates Bataviae, quae saepissime captivum per instrumenta technica observare solebant: quem quarta vigilia vivum, post dimidiam horam pridie Nonas Martias mortuum custodes se aspexisse confirmant. De re iudex investigabit.

Babic narratus est ob testimonium suum contra praesidentem Jugoslaviae periculum capitis adiisse: anno bismillesimo secundo occulte cum iudicibus tribunalis mundani de sceleribus in Jugolavia factis collocutus erat. In Bataviam iterum recenter redierat, ut contra successorem suum Milan Martic testimonium diceret.

Anno MCMXCI, cum Serbi Krajinae a Croatia, cuius tertiam partem occupabant, secesserunt, rem publicam liberam instituentes, Babic eius praeses creatus est et contra exercitum Croatarum per annos quinque usque ad cladem fugamque repugnavit. Anno MMIV in vincula sceleribus suis coniectus, se de superioris temporis consilio excusavit: ergo iudices poenam partim remiserunt, aliter in eum aliis homicidiis immanitate excidio inquisivissent. Frustra tamen breviorem captivitatem anno praeterito consequi conatus erat.

Anno duodebismillesimo iam unus ex ducibus Serborum Croatiae, cui nomen Slavko Dokmanovic fuit, se in viculis interfecit.

Scripsit Herimannus Novocomensis



Retro ad:

Novissima editio
Summum paginae